பாரிஸ் ஒலிம்பிக் டென்னிஸ் பெண்கள் ஒற்றையர் பிரிவு 3-4வது இடத்துக்கான போட்டியில் போலந்தின் இகா ஸ்வியாடெக், சுலோவாகியாவின் அனா கரோலினா மோதினர். அபாரமாக ஆடிய ஸ்வியாடெக் 6-2, 6-1 என்ற நேர் செட் கணக்கில் வெற்றி பெற்று வெண்கலம் வென்றார். இது, ஒலிம்பிக் வரலாற்றில் இவரது முதல் பதக்கம்.

* ஆண்கள் ஒற்றையர் பிரிவு அரையிறுதியில் ஸ்பெயினின் கார்லஸ் அல்காரஸ், கனடாவின் பெலிக்ஸ் ஆகர்-அலிசியாம் மோதினர். இதில் அல்காரஸ் 6-1, 6-1 என வெற்றி பெற்று பைனலுக்கு முன்னேறினார்.

ஆன்டி முர்ரே ஓய்வு
டென்னிஸ் ஆண்கள் இரட்டையர் பிரிவு காலிறுதியில் பிரிட்டனின் ஆன்டி முர்ரே, டேனியல் ஈவன்ஸ் ஜோடி 2-6, 4-6 என அமெரிக்காவின் டெய்லர் ஹாரி பிரிட்ஸ், டாமி பால் ஜோடியிடம் தோல்வியடைந்தது. இதனையடுத்து சர்வதேச போட்டியில் இருந்து ஓய்வை அறிவித்த ஆன்டி முர்ரே, கண்ணீருடன் விடை பெற்றார். கிராண்ட்ஸ்லாம் ஒற்றையரில் 3 பட்டம் (2012ல் யு.எஸ்., ஓபன், 2013, 2016ல் விம்பிள்டன்) வென்றுள்ள முர்ரே, ஒலிம்பிக் ஒற்றையரில் 2 தங்கம் (2012, 2016), இரட்டையரில் ஒரு வெள்ளி (2012) பதக்கம் கைப்பற்றினார்.