புதுடில்லி, ''நாட்டின் உணர்வை கொண்டாடும் ஒரு தனித்துவமான தளமாக, 'மன் கி பாத்' நிகழ்ச்சி மாறியுள்ளது. மேலும், தேசத்தின் கூட்டு பலத்தை இந்த நிகழ்ச்சி வெளிப்படுத்துகிறது,'' என, பிரதமர் நரேந்திர மோடி பெருமிதம் தெரிவித்தார்.

கடந்த 2014ல், பிரதமராக முதன்முறையாக நரேந்திர மோடி பதவியேற்றார். அப்போது முதல், மாதந்தோறும் கடைசி ஞாயிற்றுக்கிழமைகளில், வானொலியில், 'மன் கி பாத்' எனப்படும் மனதின் குரல் என்ற நிகழ்ச்சி வாயிலாக, நாட்டு மக்களிடையே அவர் உரையாற்றி வருகிறார்.

இந்த நிகழ்ச்சி, 10 ஆண்டுகளை நிறைவு செய்ய உள்ளது.

இந்த நிகழ்ச்சியின், 114வது ஒலிபரப்பில் பிரதமர் மோடி நேற்று கூறியதாவது:

மனதின் குரல் நிகழ்ச்சி, 10 ஆண்டுகளுக்கு முன், அக்., 3-ல், விஜயதசமி தினத்தன்று துவங்கப்பட்டது. வரும் அக்., 3ல், இந்த நிகழ்ச்சி, 10 ஆண்டுகளை நிறைவு செய்கிறது. இதில் சுவாரசியம் என்னவென்றால், அன்றைய தினம் நவராத்திரி பண்டிகையின் முதல் நாள்.

இந்த நீண்டநெடிய பயணத்தில் பல கட்டங்களை என்னால் மறக்க முடியாது. இந்த பயணத்தில் கோடிக்கணக்கான நேயர்கள் எனக்கு தோள் கொடுத்தனர்.

அவர்கள் நாட்டின் அனைத்து இடங்களிலிருந்தும் தகவல்களை திரட்டித் தந்தனர். மனதின் குரல் நேயர்கள் மட்டுமே இந்த நிகழ்ச்சியின் உண்மையான தொகுப்பாளர்கள்.

காரசாரமான விஷயங்கள் இல்லையென்றால், ஒரு நிகழ்ச்சி அதிக கவனத்தைப் பெறாது என கூறுவர்.

ஆனால், மனதின் குரல் நிகழ்ச்சி அனைத்து தரப்பு மக்களையும் உள்ளடக்கி வெற்றி பெற்றுள்ளது. நாட்டின் உணர்வை கொண்டாடும் ஒரு தனித்துவமான தளமாக, மன் கி பாத் நிகழ்ச்சி மாறியுள்ளது. மேலும், தேசத்தின் கூட்டு பலத்தை இந்த நிகழ்ச்சி வெளிப்படுத்துகிறது.

கடந்த சில வாரங்களாகவே நாட்டின் பல்வேறு இடங்களில் கனமழை பெய்து வருகிறது. நீர் சேமிப்பு எத்தனை மகத்துவம் வாய்ந்தது, நீரைச் சேமித்து வைப்பது எத்தனை அவசியமானது என்பதை இந்த மழைக்காலம் நமக்கு அறிவுறுத்துகிறது.

நம் நாடு ஒரு உற்பத்தி சக்தி மையமாக மாறியுள்ளது. நாட்டின் இளைஞர் சக்தியால் தான், ஒட்டுமொத்த உலகமும் நம்மை உற்று நோக்குகிறது. ஆட்டோமொபைல், ஜவுளி என, அனைத்து துறைகளிலும் ஏற்றுமதி அதிகரித்து வருகிறது.

இவ்வாறு அவர் கூறினார்.