டேராடூன்: தேசிய விளையாட்டு பளுதுாக்குதலில் தமிழகத்தின் அஜித் தங்கம் வென்றார்.
உத்தரகாண்ட் மாநிலத்தில், தேசிய விளையாட்டு 38வது சீசன் நடக்கிறது. ஆண்களுக்கான 73 கிலோ பளுதுாக்குதலில் தமிழகத்தின் அஜித் நாராயணா தங்கம் வென்றார். ஹரியானாவின் தீபக், சர்வீசஸ் அணியின் லால்ஹுந்தாரா முறையே வெள்ளி, வெண்கலம் கைப்பற்றினர்.


நீச்சலில் 2 பதக்கம்: ஆண்களுக்கான நீச்சல் போட்டி 200 மீ., 'பேக் ஸ்டிரோக்' பிரிவில் தமிழகத்தின் நிதிக் (2 நிமிடம், 04.75 வினாடி) வெள்ளி வென்றார். மகாராஷ்டிராவின் ரிஷாப் தாஸ் (2:03.34) தங்கம் கைப்பற்றினார். குஜராத் வீரர் தேவான்ஷ் (2:06.56) வெண்கலம் வென்றார்.
ஆண்களுக்கான 50 மீ., 'பிரீஸ்டைல்' பிரிவில் தமிழகத்தின் ஜாஷுவா தாமஸ் (23.40 வினாடி) வெண்கலம் வென்றார். மகாராஷ்டிராவின் மிஹிர் (23.29 வினாடி), கர்நாடகாவின் ஸ்ரீஹரி நடராஜ் (23.27 வினாடி) முறையே தங்கம், வெள்ளி வென்றனர்.


பெண்களுக்கான 50 மீ., 'பிரீஸ்டைல்' பிரிவில் கர்நாடகாவின் தினிதி (26.96 வினாடி) தங்கத்தை தட்டிச் சென்றார். இது, இம்முறை இவர் வென்ற 4வது தங்கம். மகாராஷ்டிராவின் அவந்திகா (27.28 வினாடி), கர்நாடகாவின் நினா (27.34 வினாடி) முறையே வெள்ளி, வெண்கலம் கைப்பற்றினர்.

பிந்தியாராணி சாதனை: பெண்களுக்கான பளுதுாக்குதல் 55 கிலோ எடைப்பிரிவில், மணிப்பூரின் பிந்தியாராணி தேவி பங்கேற்றார். 'ஸ்னாட்ச்' பிரிவில் 88, 'கிளீன் அண்ட் ஜெர்க்' பிரிவில் 113 என, மொத்தம் 201 கிலோ பளுதுாக்கிய பிந்தியாராணி, தங்கப்பதக்கத்தை தட்டிச் சென்றார். 'ஸ்னாட்ச்' பிரிவில் 88 கிலோ பளுதுாக்கிய இவர், தேசிய சாதனை படைத்தார். இதற்கு முன், மீராபாய் சானு 86 கிலோ பளுதுாக்கி இருந்தார். ஏற்கனவே 'கிளீன் அண்ட் ஜெர்க்' பிரிவில் தேசிய சாதனை பிந்தியாராணியின் வசம் உள்ளது.
பெங்கால் வீராங்கனை ஷரபானி தாஸ் (187 கிலோ), மணிப்பூரின் நிலாம் தேவி (182 கிலோ) முறையே வெள்ளி, வெண்கலம் கைப்பற்றினர்.


துப்பாக்கி சுடுதல்: ஆண்களுக்கான துப்பாக்கி சுடுதல் தனிநபர் 10 மீ., 'ஏர் ரைபிள்' பிரிவு பைனலில் மகாராஷ்டிராவின் பார்த் மானே, 252.6 புள்ளிகளுடன் முதலிடம் பிடித்து தங்கப்பதக்கம் வென்றார். மற்றொரு மகாராஷ்டிரா வீரர் ருத்ராங்க் ஷ் பாட்டீல் வெள்ளி, சர்வீசஸ் அணியின் கிரண் ஜாதவ் வெண்கலம் வென்றனர். பஞ்சாப் வீரர் அர்ஜுன் பாபுதா 4வது இடம் பிடித்து ஏமாற்றினார்.

ஹேண்ட்பால்: ஆண்களுக்கான 'பீச்' ஹேண்ட்பால் பைனலில் சர்வீசஸ், உத்தரகாண்ட் அணிகள் மோதின. இதில் சர்வீசஸ் அணி 40-36 என்ற கணக்கில் வெற்றி பெற்று தங்கம் வென்றது. பெண்களுக்கான பைனலில் ஹரியானா அணி 54-12 என கேரளாவை வீழ்த்தி தங்கத்தை கைப்பற்றியது.