கோபி:கோபி வேளாண்மை உற்பத்தியாளர் கூட்டுறவு விற்பனை சங்கத்தில், ஓராண்டில், 11.84 லட்சம் வாழைத்தார், 11 கோடி ரூபாய்க்கு விற்றுள்ளது.

ஈரோடு மாவட்டம் கோபி வேளாண்மை உற்பத்தியாளர் கூட்டுறவு விற்பனை சங்கத்தில், வாரந்தோறும் புதன் மற்றும் சனிக்கிழமைகளில் வாழைத்தார் ஏலம் நடக்கிறது. சுற்று வட்டார பகுதி விவசாயிகள் வாழைத்தார்களை ஏலத்துக்கு கொண்டு வருகின்றனர். சேலம், தர்மபுரி, திருப்பூர், கோவை, அவிநாசி பகுதி வியாபாரிகள் வாங்கி செல்கின்றனர். கடந்த, 2024 ஏப்.,1 முதல், நடப்பாண்டு மார்ச் 31 வரையான ஓராண்டில், கதளி, நேந்திரன் பழங்கள், 66 டன்; பூவன், தேன்வாழை, செவ்வாழை, ரஸ்தாளி, மொந்தன், பச்சைநாடான், ரொபஸ்டா ரக பழங்கள், 11.84 லட்சம் வாழைத்தாரும் விற்றுள்ளது. கதளி, நேந்திரன் உட்பட மொத்தம் ஒன்பது ரக பழங்கள், 11.05 கோடி ரூபாய்க்கு விற்பனையாகி உள்ளது. இதன் மூலம், 23 ஆயிரத்து, 717 விவசாயிகள், 4,572 வியாபாரிகள் பயன் பெற்றதாக, சங்க நிர்வாகிகள் தெரிவித்தனர்.