உங் டாவ்: வியட்நாமில் 17 வயதுக்குட்பட்ட நட்சத்திரங்களுக்கான ஆசிய மல்யுத்த சாம்பியன்ஷிப் தொடர் நடந்தது. பெண்களுக்கான 'பிரீஸ்டைல்' பிரிவு போட்டிகள் நடந்தன.
43 கிலோ பிரிவு பைனலில் இந்தியாவின் ரச்சனா, 9-0 என ஜப்பானின் மிரா ஹிகாசியை வீழ்த்தி, தங்கம் கைப்பற்றினார். 46 கிலோ பைனலில் இந்தியாவின் ருடுஜா, 10-0 என உஸ்பெகிஸ்தானின் மஷ்ஹுராவை வீழ்த்தினார். 57 கிலோ பைனலில் இந்தியாவின் மோனி, கஜகஸ்தானின் உஸ்மனோவாவை 'நாக் அவுட்' செய்து, தங்கம் கைப்பற்றினார்.
மற்றொரு பைனலில் (65 கிலோ) இந்தியாவின் அஷ்வினி, 2-0 என சீனாவின் இகிங் ஜியாவை சாய்த்தார். 69 கிலோ பைனலில் இந்தியாவின் மணிஷா, 8-0 என சீனாவின் ஜியாகி ஜுவை சாய்த்தார்.
தவிர, சேஷ்தா (40), டினா புனியா (61), காஜல் (73) வெள்ளிப்பதக்கம் கைப்பற்றினர். அஞ்சலி (49), சாரிகா (53), வெண்கலம் வென்றனர். மொத்தம் பங்கேற்ற 10 பிரிவுகளில் இந்தியா 5 தங்கம், 3 வெள்ளி, 2 வெண்கலம் என 10 பதக்கம் வசப்படுத்தி, ஒட்டுமொத்த சாம்பியன் ஆனது.