தாகா: ஆசிய வில்வித்தையில் இந்திய வீராங்கனை அங்கிதா பகத் ('ரீகர்வ்') தங்கம் வென்றார்.
வங்கதேசத்தின் தாகாவில், ஆசிய வில்வித்தை சாம்பியன்ஷிப் நடக்கிறது. பெண்களுக்கான தனிநபர் 'ரீகர்வ்' பிரிவு பைனலில் இந்தியாவின் அங்கிதா பகத், பாரிஸ் ஒலிம்பிக்கில் வெள்ளி வென்ற தென் கொரியாவின் நாம் சுஹியோன் மோதினர். அபாரமாக ஆடிய அங்கிதா 7-3 (29-27, 26-26, 26-28, 29-28, 29-28) என்ற கணக்கில் வெற்றி பெற்று தங்கப்பதக்கத்தை தட்டிச் சென்றார்.


வெண்கலப் பதக்கத்துக்கான போட்டியில் இந்தியாவின் தீபிகா குமாரி, சங்கீதா மோதினர். விறுவிறுப்பான இப்போட்டி 5-5 (28-28, 28-23, 28-26, 28-29, 28-29) என சமநிலை வகித்தது. பின் 'ஷூட் ஆப்' முறையில் அசத்திய சங்கீதா 6-5 என வெற்றி பெற்று வெண்கலம் வென்றார்.

ஆண்களுக்கான தனிநபர் 'ரீகர்வ்' பிரிவு பைனலில் இந்தியாவின் திராஜ், ராகுல் மோதினர். இதில் திராஜ் 6-2 (28-28, 29-26, 28-28, 28-26) என வெற்றி பெற்று தங்கத்தை கைப்பற்றினார். ராகுல் வெள்ளி வென்றார்.

இந்தியா 'தங்கம்': ஆண்கள் அணிகளுக்கான 'ரீகர்வ்' பிரிவு பைனலில் இந்தியா, தென் கொரியா அணிகள் மோதின. இந்தியா சார்பில் ராகுல், அடானு தாஸ், யாஷ்தீப் சஞ்சய் பங்கேற்றனர். இப்போட்டி 4-4 (56-56, 56-56, 57-51, 53-57) சமநிலை வகித்தது. பின் 'ஷூட் ஆப்' முறையில் அசத்திய இந்தியா 5-4 என்ற கணக்கில் வெற்றி பெற்று தங்கம் வென்றது.

இதன்மூலம் 18 ஆண்டுகளுக்கு பின் ஆசிய சாம்பியன்ஷிப் 'ரீகர்வ்' பிரிவில் இந்திய அணிக்கு தங்கம் கிடைத்தது. கடைசியாக 2007ல் தங்கம் வென்றிருந்தது.

இத்தொடரில் 6 தங்கம், 3 வெள்ளி, ஒரு வெண்கலம் என 10 பதக்கம் கைப்பற்றிய இந்தியா முதலிடம் பிடித்தது.