தோஹா: வைபவ் சூர்யவன்ஷி 32 பந்தில் சதம் விளாச, இந்தியா 'ஏ' அணி 148 ரன் வித்தியாசத்தில் யு.ஏ.இ., அணியை வீழ்த்தியது.

கத்தார் தலைநகர் தோஹாவில், இளம் வீரர்களுக்கான 'ரைசிங் ஸ்டார்' ஆசிய கோப்பை ('டி-20') 7வது சீசன் நடக்கிறது. இந்தியா 'ஏ', இலங்கை 'ஏ', வங்கதேசம் 'ஏ', ஓமன், ஹாங்காங் உள்ளிட்ட 8 அணிகள், இரு பிரிவுகளாக லீக் சுற்றில் விளையாடுகின்றன.

'பி' பிரிவு லீக் போட்டியில் இந்தியா 'ஏ', ஐக்கிய அரபு எமிரேட்ஸ் (யு.ஏ.இ.,) அணிகள் மோதின. 'டாஸ்' வென்று முதலில் 'பேட்' செய்த இந்தியா 'ஏ' அணிக்கு பிரியான்ஷ் ஆர்யா (10) சோபிக்கவில்லை. நமன் திர் (34) ஓரளவு கைகொடுத்தார். முதல் பந்தில் 'அவுட்' வாய்ப்பில் இருந்து தப்பிய 14 வயதான வைபவ் சூர்யவன்ஷி, சிக்சர், பவுண்டரிகளாக விளாசினார். இவர், 32 பந்தில் சதத்தை எட்டினார். அபாரமாக ஆடிய சூர்யவன்ஷி, 42 பந்தில், 144 ரன் (15x6, 11x4) குவித்தார். அடுத்து வந்த கேப்டன் ஜிதேஷ் சர்மா, தன்பங்கிற்கு அரைசதம் கடந்தார். நேஹல் வதேரா (14) நிலைக்கவில்லை.

இந்தியா 'ஏ' அணி 20 ஓவரில் 4 விக்கெட்டுக்கு 297 ரன் எடுத்தது. ஜிதேஷ் (83 ரன், 6x6, 8x4), ராமன்தீப் சிங் (6) அவுட்டாகாமல் இருந்தனர்.

கடின இலக்கை விரட்டிய யு.ஏ.இ., அணி 20 ஓவரில், 149/7 ரன் மட்டும் எடுத்து தோல்வியடைந்தது. சோஹைப் கான் 63 ரன் விளாசினார். இந்தியா 'ஏ' அணி சார்பில் குர்ஜப்னீத் சிங் 3, ஹர்ஷ் துபே 2 விக்கெட் கைப்பற்றினர்.


32 பந்தில்...

32 பந்தில் சதம் விளாசிய வைபவ் சூர்யவன்ஷி, 'டி-20' வரலாற்றில் அதிவேக சதமடித்த இந்திய வீரர்கள் பட்டியலில் 2வது இடத்தை ரிஷாப் பன்ட் (டில்லி, 2018, எதிர்: இமாச்சல பிரதேசம்) உடன் பகிர்ந்து கொண்டார். முதலிடத்தை, தலா 28 பந்தில் சதம் விளாசிய உர்வில் படேல் (குஜராத், 2024, எதிர்: திரிபுரா), அபிஷேக் சர்மா (பஞ்சாப், 2024, எதிர்: மேகாலயா) பகிர்ந்து கொண்டுள்ளனர்.

144 ரன்

நேற்று, 144 ரன் குவித்த வைபவ் சூர்யவன்ஷி, ஒட்டுமொத்த 'டி-20' அரங்கில் ஒரு இன்னிங்சில் அதிக ரன் விளாசிய இந்திய வீரர்கள் பட்டியலில் 4வது இடம் பிடித்தார். முதல் மூன்று இடங்களில் திலக் வர்மா (ஐதராபாத், 151 ரன், எதிர்: மேகாலயா, 2024), ஷ்ரேயஸ் ஐயர் (மும்பை, 147 ரன், எதிர்: சிக்கிம், 2019), புனித் பிஷ்ட் (மேகாலயா, 146* ரன், எதிர்: மிசோரம், 2021) உள்ளனர்.

15 சிக்சர்

'டி-20' அரங்கில் ஒரு இன்னிங்சில் அதிக சிக்சர் பறக்கவிட்ட இந்திய வீரர்கள் வரிசையில் 2வது இடத்தை ஷ்ரேயஸ் ஐயருடன் பகிர்ந்து கொண்டார் வைபவ் சூர்யவன்ஷி. இருவரும் தலா 15 சிக்சர் விளாசினர். முதலிடத்தில் புனித் பிஷ்ட் (17 சிக்சர்) உள்ளார்.