சென்னை: செம்பரம்பாக்கம் ஏரியில் இருந்து வெளியேற்றப்படும் தண்ணீரின் அளவு வினாடிக்கு 2500 கன அடியாக அதிகரிக்கப்பட்டு உள்ளது.

தமிழக கடலோர மாவட்டங்களில் டிட்வா புயல் எதிரொலியாக இடைவிடாது மழை கொட்டி வருகிறது. புயலின் தாக்கம் மேலும் நீடிக்கும் என்பதால் மழை தொடர்ந்து பெய்யும் என்று சென்னை வானிலை ஆய்வு மையம் அறிவித்துள்ளது. திருவள்ளூர், ராணிப்பேட்டை ஆகிய மாவட்டங்களில் நாளை கன மழை முதல் மிக கன மழைக்கு வாய்ப்பு உள்ளதாகவும் வானிலை ஆய்வு மையம் எச்சரித்துள்ளது.

இந் நிலையில் கனமழை காரணமாக, செம்பரம்பாக்கம் ஏரிக்கு வரும் நீரின் அளவு அதிகரித்துள்ளது. வினாடிக்கு 2000 கன அடியில் இருந்து 2500 கன அடியாக நீர் திறக்கப்பட்டு உள்ளது. இந்த நீர் திறப்பு அடுத்த சில மணி நேரங்களில் மேலும் அதிகரிக்கப்பட வாய்ப்பு உள்ளது.

நீர் திறப்பு அதிகரிக்கப்பட்டு உள்ளதால், சிறுகளத்தூர், காவனூர், குன்றத்தூர், திருமுடி வாக்கம், வழுதியம்பேடு, திருநீர்மலை மற்றும் அடையாறு ஆற்றின் இருபுறமும் தாழ்வான பகுதியில் வசிக்கும் மக்களுக்கு எச்சரிக்கை விடுக்கப்பட்டு உள்ளது.

பூண்டி ஏரியில் 3000 கன அடியில் இருந்து 3500 கன அடியாக நீர் திறப்பு அதிகரிக்கப்பட்டு உள்ளது. இதன் காரணமாக, ஒதப்பை, ஆற்றம்பாக்கம், சீமாபுரம், கோழவரம், காரனோடை, திருக்கண்டலம், இடையஞ்சாவடி, மணலி புதுநகர் பகுதி மக்களுக்கு வெள்ள அபாய எச்சரிக்கை விடப்பட்டு உள்ளது.

மேலும், 10க்கும் மேற்பட்ட கிராமங்களுக்குச் செல்லும் தரைப்பாலங்களில் முன் எச்சரிக்கை நடவடிக்கையாக போக்குவரத்து நிறுத்தப்பட்டு உள்ளது.