புதுடில்லி: காங்கிரஸ் எம்பி ராகுல் லோக்சபா மரபை விட உயர்வானவரா என்ன? ஒருவர் அவையில் பேச சபாநாயகர் அனுமதி வேண்டும் என்ற விதி கூட தெரியாதா? என பார்லிமென்ட் விவகாரத்துறை அமைச்சர் கிரண் ரிஜிஜூ கேள்வி எழுப்பி உள்ளார்.


லோக்சபா சபாநாயகர் ஓம் பிர்லாவுக்கு எதிரான நம்பிக்கையில்லா தீர்மானத்தின் மீதான விவாதத்தில் கிரண் ரிஜிஜூ பேசியதாவது: இந்த அவையில் அனைத்து எம்பிக்களும் சமம், சபையில் பேசுவதற்கு அனைவருக்கும் தலைவரின் அனுமதி தேவை. அவர் ஒரு அமைச்சர் என்பதால் மட்டும் மைக்ரோபோன் தானாகவே இயங்காது.


காங்கிரஸ் எம்பி ராகுல் லோக்சபா மரபை மீறி உயர்வானவரா என்ன ? ஒருவர் அவையில் பேச சபாநாயகர் அனுமதி வேண்டும் என்ற விதி கூட தெரியாதா? ஓம் பிர்லா சபாநாயகராக இருந்த காலத்தில் செய்யப்பட்ட சீர்திருத்தங்களை யாராலும் மறுக்க முடியாது. ஓம் பிர்லா சபாநாயகராக இருந்த காலத்தில் பூஜ்ஜிய நேரத்தில் எழுப்பப்பட்ட விஷயங்கள் மிக அதிகம்.


மேலும் விதி 377 இன் கீழ் எழுப்பப்பட்ட அதிக எண்ணிக்கையிலான விஷயங்கள், பொது நலன் சார்ந்த விஷயங்கள், சிறப்பு குறிப்புகள் அனைத்தும் ஓம் பிர்லா சபாநாயகராக இருக்கும் போது செய்யப்பட்டன.பிரதமர் இங்கே அமர்ந்திருக்கிறார். இதுபோன்ற ஒரு நிகழ்வை நான் முதல்முறையாகப் பார்த்தேன். ராகுல் அங்கிருந்து ஓடி வந்து பிரதமரைக் கட்டிப்பிடிக்கிறார். அப்படி ஒரு லோக்சபா எதிர்க்கட்சித் தலைவரை நீங்கள் பார்த்திருக்கிறீர்களா?


எதிர்க்கட்சியைச் சேர்ந்த 50 எம்.பி.க்கள் என்னைச் சந்தித்து, சபாநாயகருக்கு எதிரான தீர்மானத்தை எதிர்க்கிறோம் என்று கூறியுள்ளனர். ஆனால் அரசியல் நிர்பந்தங்களால், அவர்கள் அதை ஆதரிக்கிறார்கள். இவ்வாறு கிரண் ரிஜிஜூ பேசினார்.


சபாநாயகரை பதவி நீக்கம் செய்யக் கோரும் தீர்மானத்தின் மீது 10 மணி நேர விவாதம் நடத்த முடிவு செய்யப்பட்டுள்ளது.