சென்னை, சென்னையில் நடந்து வரும்,'பிளேஸ் வாலிபால் லீக்' போட்டியில் நேற்றைய ஆட்டத்தில், செயின்ட் பீட்டர்ஸ் அணி, ஒய்.எம்.சி.ஏ., அணியை தோற்கடித்தது.

மாநிலத்தில் முதல் முறையாக,'பிளேஸ் வாலிபால் லீக்' முதலாவது சீசன் போட்டிகள், சென்னையில் பல்வேறு பள்ளிகளில் நடைபெற்று வருகின்றன.

இந்த சீசனில் செயின்ட் பீட்ஸ், செயின்ட் மேரீஸ், மான்ட்போர்டு, டான்பாஸ்கோ, ஏ.ஜே.எஸ்., -கொட்டிவாக்கம் ஒய்.எம்.சி.ஏ.,- சேது பாஸ்கரா, செயின்ட் பீட்டர்ஸ் என, எட்டு அணிகள் பங்கேற்றுள்ளன.

'லீக்' முறையில், ஒவ்வொரு வாரமும் வெவ்வேறு பள்ளிகளில், போட்டிகள் நடக்கின்றன.

தொடர் மழையால் போட்டிகள் ஒத்திவைக்கப்பட்டன. நேற்று சாந்தோம், செயின்ட் பீட்ஸ் பள்ளி வளாகத்தில், 47வது லீக் போட்டிகள் நடந்தன.

இதில், ராயபுரம் செயின்ட் பீட்டர்ஸ் மற்றும் கொட்டிவாக்கம் ஒய்.எம்.சி.ஏ., அணிகள் பலப்பரீட்சை நடத்தின. விறுவிறுப்பான ஆட்டத்தில், 25 - 23, 25 - 22, 25 - 23 என்ற புள்ளிக் கணக்கில் செயின்ட் பீட்டர்ஸ் அணி வெற்றி பெற்றது.

ஒய்.எம்.சி.ஏ., - செயின்ட் மேரிஸ் அணிகளுக்கு இடையிலான ஆட்டம் மழையால் ஒத்திவைக்கப்பட்டது.