கடம்பத்துார்:தமிழகத்தில் அரசு பள்ளிகளின் வளர்ச்சி, மாணவ, மாணவியரின் ஒழுக்கம், சிறந்த கற்றல், கற்பித்தல், போட்டிகள், தேர்ச்சி, செயல்பாடுகள் குறித்து மாவட்ட கல்வி அதிகாரிகள் மற்றும் வட்டார கல்வி அதிகாரிகள் ஆய்வு செய்து பள்ளிக் கல்வித்துறைக்கு அறிக்கை அனுப்பப்படுகிறது.

இதில் தமிழகம் முழுதும் தேர்ந்தெடுக்கப்பட்ட 114 பள்ளிகளில் திருவள்ளூர் மாவட்டம் கடம்பத்துார் ஒன்றியம் வெங்கத்துார் கண்டிகை ஊராட்சி ஒன்றிய நடுநிலைப்பள்ளி சிறந்த பள்ளியாக தேர்ந்தெடுக்கப்பட்டது.

இதற்கான விழா பள்ளி கல்வித்துறை சார்பில் குழந்தைகள் தினமான நவ. 14ம் தேதி சென்னை சாந்தோம் மேல்நிலைப்பள்ளியில் நடந்தது. இதில் சிறந்த பள்ளியாக தேர்ந்தெடுக்கப்பட்ட வெங்கத்துார் அரசு நடுநிலைப்பள்ளிக்கான விருதை பள்ளிக்கல்வித்துறை அமைச்சர் மகேஷ் பள்ளியின் தலைமையாசிரியர் இசக்கியம்மாள் வட்டாரக் கல்வி அலுவலர் ரமேஷ் மற்றும் பள்ளி ஆசிரியர் சகாயமேரி ஆகியோரிடம் வழங்கினார்.

திருவள்ளூர் மாவட்டத்தில் திருவள்ளூர் பெரியகுப்பம் நகராட்சி நடுநிலைப்பள்ளி, வெங்கத்துார் ஊராட்சி ஒன்றிய நடுநிலைப்பள்ளி, சோழாவரம் ஊராட்சி ஒன்றிய துவக்கபள்ளி ஆகிய மூன்று பள்ளிகள் சிறந்த பள்ளிகளாக தேர்வு செய்யப்பட்டதாக கல்வித்துறையின் தெரிவித்தனர்.