இளைஞர் வெட்டிக் கொலை

மேலுார்: தெற்குத்தெரு பழனிச்சாமி மகன் விவேக் 25, ஆடு வளர்க்கும் தொழில் செய்தார். நேற்று தர்மசானபட்டி செல்லும் வழியில் வயல் பகுதியில் கொட்டகை அமைத்து ஆடுகளை அடைத்திருந்தார். ஆடுகளின் பாதுகாப்பிற்காக கொட்டகை அருகே கட்டிலில் படுத்திருந்தார். நேற்று காலை தலை, கை உள்ளிட்ட பல இடங்களில் வெட்டுக்காயங்களுடன் கொலை செய்யப்பட்டு கிடந்தார். விசாரணையில் தீபாவளியின் போது நண்பரை அடித்த பிரச்னையில் நால்வர் சேர்ந்து கொலை செய்திருக்கலாம் என்ற கோணத்தில் இன்ஸ்பெக்டர் சிவசக்தி விசாரிக்கிறார். கொலையான விவேக்கிற்கு திருமணத்திற்காக பெண் பார்த்திருப்பது குறிப்பிடத்தக்கது.

தவறி விழுந்த முதியவர் பலி

திருமங்கலம்: மேலக்கோட்டையைச் சேர்ந்த சின்னராசு 80, நேற்று திருமங்கலத்தில் இருந்து கூடக்கோவிலுக்கு சென்ற தனியார் பஸ்சில் பயணம் செய்தார். மேலக்கோட்டை 'அண்டர் பாஸ்' பாலத்தை கடந்த போது பஸ் வேகத்தடையில் ஏறி இறங்கியது. இதில் பஸ்சில் இருந்து சின்னராசு தவறி விழுந்து காயமடைந்தார். மருத்துவமனைக்கு செல்லும் வழியில் பலியானார். திருமங்கலம் போலீசார் விசாரிக்கின்றனர்.