ஒகேனக்கல்:தை அமாவாசையையொட்டி, ஒகேனக்கல் காவிரி ஆற்றங்கரையோரத்தில், நேற்று முன்னோர்களுக்கு தர்ப்பணம், திதி கொடுத்து மக்கள் வழிபட்டனர்.
ஆடி அமாவாசை, புரட்டாசி அமாவாசை, தை அமாவாசை நாட்களில் நீர்நிலைகளில் புனித நீராடி முன்னோர்களுக்கு திதி மற்றும் தர்ப்பணம் கொடுத்தால், குடும்பத்தில் வளம் செழிக்கும் என்பது ஜதீகம். நேற்று, தை அமாவாசை என்பதால், ஒகேனக்கல் காவிரியாற்றில் ஏராளமனோர் புனித நீராடி முன்னோர்களுக்கு தர்ப்பணம் கொடுத்து வழிபட்டனர். பூஜை செய்த பொருட்கள் அனைத்தையும் ஆற்றிலே விட்டு, ஆற்றில் நீராடி அங்குள்ள காவிரியம்மனை வழிபட்டனர்.
* அரூர் அடுத்த தீர்த்தமலை மலை மீதுள்ள தீர்த்தகிரீஸ்வரர் கோவில் தீர்த்தத்தில் நேற்று ராமர், கவுரி உள்ளிட்ட, 5 தீர்த்தங்களில் ஏராளமான பக்தர்கள் புனித நீராடினர். தொடர்ந்து, நீண்ட வரிசையில் காத்திருந்து சுவாமி தரிசனம் செய்தனர். முன்னதாக, தீர்த்தகிரீஸ்வரருக்கு சிறப்பு அபிஷேகம் மற்றும் ஆராதனை நடந்தது. அதேபோல், டி.அம்மாபேட்டை, இருமத்துார் உள்ளிட்ட தென்பெண்ணை ஆற்றங்கரையோரத்தில், தை அமாவாசை வழிபாடு நடந்தது.