வாலாஜாபாத்:வாலாஜாபாத் பேருந்து நிலையம் எதிரே சார் - பதிவாளர் அலுவலகம் உள்ளது. இதே வளாகத்தின் மற்றொரு புறத்தில் பேரூராட்சி அலுவலகம் இயங்கி வருகிறது.

இந்த வளாகத்தின் சுற்றுச்சுவர்களில், அரசியல் கட்சி விளம்பரம், தனியார் நிறுவனம் மற்றும் வாலாஜாபாத் சுற்றுவட்டார பகுதிகளைச் சேர்நதோர் பிறந்த நாள், கண்ணீர் அஞ்சலி உள்ளிட்ட சுவரொட்டிகள் அதிகளவில் ஒட்டப்பட்டு வருகின்றன.

இதனால், அலுவலக சுற்றுச்சுவர் முழுதும் அலங்கோலமாக காட்சியளிக்கிறது. இந்த சுவரொட்டிகள் நெடுஞ்சாலையில் செல்லும் வாகன ஓட்டிகளின் கவனத்தை சிதறச் செய்வதால், விபத்துகள் ஏற்படும் அபாயம் உள்ளது.

இதுகுறித்து, அப்பகுதி சமூக ஆர்வலர்கள் கூறியதாவது:

வாலாஜாபாத் சார் - பதிவாளர் அலுவலகத்திற்கு சுற்றுவட்டார பகுதிகளைச் சேர்ந்தோர், தினமும் சொத்து பத்திரம் பதிவு, திருமணப்பதிவு உள்ளிட்டவை தொடர்பாக பதிவு செய்ய வருகின்றனர்.

இவ்வாறு நல்ல நிகழ்ச்சிகள் குறித்தான தீர்வுக்கு உள்ளே செல்லும் போது, காலமானார், நினைவஞ்சலி உள்ளிட்ட சுவரொட்டிகள் பார்க்கையில் முகம்சுளிக்க வைக்கிறது. எனவே, வாலாஜாபாத் சார் - பதிவாளர் அலுவலக சுற்றுச்சுவரில் அனுமதி இல்லமால் சுவரொட்டிகள் ஒட்டுவதை தவிர்க்க நடவடிக்கை எடுக்க வேண்டும்.

இவ்வாறு அவர்கள் கூறினர்.