பொள்ளாச்சி : உயர்கல்வி படிக்கும் மாணவர்களுக்கு, கல்விக்கடன் வழங்கும் போது, வங்கிகளில் கல்வி கட்டணம் மட்டுமே கருத்தில் கொள்ளப்படுவதால், பிற செலவினங்களை சமாளிக்க வழியின்றி, உயர்கல்வியில் இடைநிற்றல் அதிகரிப்பதாக புகார் எழுந்துள்ளது.


தமிழகத்தில், பிளஸ் 2 படித்த மாணவர்கள் உயர்கல்வி பயிலும் வகையில் 'நான் முதல்வன்' திட்டம் செயல்படுத்தப்படுகிறது. இத்திட்டத்தில், பிளஸ் 2 தேர்ச்சி பெற்ற மாணவர்கள், கல்லுாரி படிப்புகள் மற்றும் கல்லுாரி சார்ந்த விபரங்களை அறிந்து கொள்ளும் பொருட்டு, 'கல்லுாரி கனவு' முகாம் நடத்தப்படுகிறது.


இந்நிகழ்ச்சியில், வெவ்வேறு துறை சார்ந்த வல்லுநர்கள், மாணவர்களுக்கு உயர்கல்வி படிப்புகள் குறித்தும், கல்விக்கடன், வேலைவாய்ப்பு, போட்டி தேர்வுகள் குறித்த விபரங்களை வழங்குகின்றனர். குறிப்பாக, மாணவர் ஒரு கல்லுாரியில் சேர விருப்பம் தெரிவித்தால், அக்கல்லுாரி தொடர்புடைய வங்கியுடன் மாணவர் விபரம் 'லிங்க்' செய்யப்படுகிறது.


தவிர, அரசு நிர்ணயித்த கல்விக் கட்டணத்தை குறிப்பிட்டு ரசீது பெற்றாலும், உரிய பாதுகாப்பு ஆவணங்கள் சமர்ப்பித்தால் மட்டுமே, வங்கிக் கடன் வழங்கப் படுகிறது. மேலும், ஹாஸ்டல், புத்தகம், தேர்வு கட்டணத்துக்கு கடன் வழங்கப்படுவதில்லை. அவ்வாறு, உரிய கல்வி கடன் பெற்று, கல்லுாரியில் மாணவர்கள் சேர்ந்தாலும், இதர செலவுகளால் திணறி, மாணவர்கள் ஓராண்டுக்குப் பின் படிப்பை தொடர முடிவதில்லை, என அரசு பள்ளி தலைமையாசிரியர்கள் தெரிவிக்கின்றனர்.


இது குறித்து, தலைமை ஆசிரியர்கள் கூறியதாவது: 'கல்லுாரி கனவு' முகாம் வாயிலாக, தனியார் கல்லுாரிகளில் மாணவர்களை சேர்க்கவே முற்படுகின்றனர். கல்விக் கடன் பெற்றுத் தருவதற்கான வங்கிகள் குறித்த விபரம் மட்டுமே அளிக்கின்றனர். இதற்காக, பள்ளி அளவில், அதிக மதிப்பெண்கள் பெற்ற மாணவர்களை அழைத்து செல்லவே அனுமதிக்கப்படுகிறது.


கிராமங்களைச் சேர்ந்த, ஏழை எளிய மாணவர்கள், கல்விக் கடன் கிடைக்கிறதே என்ற எண்ணத்தில், விரும்பும் கல்லுாரியில் சேர முடிவதில்லை. உரிய பாதுகாப்பு ஆவணங்கள் சமர்ப்பித்து கல்விக்கடன் பெற்றாலும், விடுதி, உணவு, உடை உள்ளிட்ட பிற செலவினங்களால், செய்வதறியாது திணறுகின்றனர். இரண்டாம் ஆண்டு, வங்கிக் கடன் தவணை பெறுவதில் தாமதம் உள்ளிட்ட காரணங்களால், கல்லுாரி படிப்பை பாதியில் கைவிடுகின்றனர்.


அதன்பின், அவரவர் பகுதியில் உள்ள ஐ.டி.ஐ., பாலிடெக்னிக் கல்லுாரி யில் சேருகின்றனர். எனவே, கல்லுாரி கனவு நிகழ்ச்சியை நடத்துவதை காட்டிலும், அரசு கல்லுாரிகளில் கட்டமைப்புகளை மேம்படுத்த வேண்டும். காலத்துக்கு ஏற்ற புதிய படிப்புகளை கொண்டு வருவதுடன், மாணவர்களின் சேர்க்கை எண்ணிக்கையை அதிகரிக்க வேண்டும். இதன் வாயிலாக, ஏழை எளிய மாணவர்களின் கல்லுாரி படிப்பும் நனவாகும். இவ்வாறு, கூறினர்.