ரோசாரியோ: ஜூனியர் ஹாக்கி லீக் போட்டியில் இந்திய பெண்கள் அணி -3-1 என 'பெனால்டி ஷூட் அவுட்' முறையில் உருகுவேயை வென்றது.
அர்ஜென்டினாவில், நான்கு நாடுகள் பங்கேற்கும் ஜூனியர் பெண்களுக்கான சர்வதேச ஹாக்கி தொடர் நடக்கிறது. இந்தியா, அர்ஜென்டினா, சிலி, உருகுவே அணிகள் பங்கேற்கின்றன. முதல் மூன்று போட்டியில் வென்ற இந்தியா, 4வது போட்டியில் சிலியிடம் தோல்வியடைந்தது. இந்திய அணி, தனது 5வது போட்டியில் உருகுவே அணியை மீண்டும் சந்தித்தது.

விறுவிறுப்பான இப்போட்டி ஆட்டநேர முடிவில் 2-2 என சமநிலையில் இருந்தது. இந்திய அணிக்கு துணை கேப்டன் ஹினா (10வது நிமிடம்), லால்ரின்புய் (24வது) தலா ஒரு கோல் அடித்து கைகொடுத்தனர்.
பின் போட்டியின் முடிவு 'பெனால்டி ஷூட் அவுட்' முறைக்கு சென்றது. இதில் கீதா, கனிகா, லால்தான்ட்லுவாகி தலா ஒரு கோல் அடித்து கைகொடுக்க இந்திய அணி 3-1 என்ற கணக்கில் வெற்றி பெற்றது.