பாங்காக்: தாய்லாந்து ஓபன் குத்துச்சண்டையில் இந்தியாவுக்கு 2 தங்கம் உட்பட 8 பதக்கம் கிடைத்தது.

தாய்லாந்து தலைநகர் பாங்காக்கில், சர்வதேச குத்துச்சண்டை தொடர் நடந்தது. ஆண்களுக்கான 75 கிலோ பிரிவு பைனலில் இந்தியாவின் தீபக், உஸ்பெகிஸ்தானின் அப்துரகிமோவ் ஜாவோகிர் மோதினர். துவக்கத்தில் இருந்து ஆதிக்கம் செலுத்திய தீபக் 5-0 என வெற்றி பெற்று தங்கத்தை தட்டிச் சென்றார்.

ஆண்களுக்கான 90 கிலோ பிரிவு பைனலில் இந்தியாவின் நமன் 4-1 என சீனாவின் ஹான் சூயிஜென்னை வீழ்த்தி தங்கத்தை கைப்பற்றினார். பெண்களுக்கான 80+ கிலோ பிரிவு பைனலில் இந்தியாவின் கிரண் 2-3 என கஜகஸ்தானின் யெல்டானா தலிபோவாவிடம் தோல்வியடைந்து வெள்ளி வென்றார்.
அரையிறுதியில் ஏமாற்றிய இந்தியாவின் தமன்னா (51 கிலோ), பிரியா (57 கிலோ), சஞ்சு (60 கிலோ), சனே (70 கிலோ), லால்பக்மாவி ரால்தே (80 கிலோ) வெண்கலம் வென்றனர். இத்தொடரில் இந்தியாவுக்கு 2 தங்கம், ஒரு வெள்ளி, 5 வெண்கலம் என 8 பதக்கம் கிடைத்தது.