புதுடில்லி:அண்மையில் அரிய வகை தாது பொருட்கள் மற்றும் காந்தம் ஏற்றுமதிக்கு சீனா கடும் கட்டுப்பாடுகளை விதித்துள்ளது. ராணுவத்துக்கு அல்லாத பயன்பாட்டுக்கு மட்டும் இறக்குமதி செய்வதாக, அந்தந்த நாட்டின் அரசிடம் இருந்து சான்றிதழ் பெற்று தருவோருக்கு மட்டுமே, அரிய வகை தாதுப் பொருட்கள் இறக்குமதிக்கு அனுமதி தரப்படும். அதிலும், சீன அரசின் கட்டுப்பாட்டின்கீழ் குறைந்த அளவிலான ஏற்றுமதியே அனுமதிக்கப்படும் என்றும் கூறப்பட்டுள்ளது.

மின்சார வாகன தயாரிப்பு உள்ளிட்ட பலவற்றுக்கு தேவைப்படும் காந்தத்தை ஏற்றுமதி செய்வதிலும் சீனா கட்டுப்பாடுகளை விதித்துள்ளது.

சீன அரசின் கட்டுப்பாடுகளால், அந்நாட்டிலிருந்து காந்த ஏற்றுமதி 51 சதவீதம் அளவுக்கு சரிவைக் கண்டுள்ளது. இதனால், உலகளவில் மின்சார வாகன தயாரிப்பு பாதிக்கப்படும் அபாயம் ஏற்பட்டுள்ளது. இந்தியாவிலும் மின்சார வாகன உற்பத்தி ஸ்தம்பிக்கும் சூழல் ஏற்பட்டுள்ளது.

சீனாவின் இந்த முடிவால், கார் நிறுவனங்கள் மூடப்படும் அபாயம் உள்ளதாக, அமெரிக்க அரசுக்கு ஜெனரல் மோட்டார்ஸ், டொயோட்டா, போக்ஸ்வேகன், ஹூண்டாய் நிறுவனங்கள் அவசர கடிதம் எழுதியுள்ளன.

இந்தியாவைப் பொறுத்தவரை, வாகன தயாரிப்பு நிறுவனங்களிடம் உள்ள இறக்குமதி காந்தத்தின் இருப்பு, மே மாதத்துடன் தீர்ந்து விடும் என, வாகன நிறுவனங்கள் சங்கமான சியாம் எச்சரித்துள்ளது.

சீனாவுடன் பேச்சு நடத்தி, காந்த இறக்குமதியை சீர்செய்யுமாறு, அரசிடம் மாருதி சுசூகி, மஹிந்திரா, டாடா மோட்டார்ஸ் போன்ற நிறுவனங்கள் வலியுறுத்தி உள்ளன.

சீன காந்த இறக்குமதி பிரச்னையில் பிரதமர் மோடி தலையிட வேண்டுமென, மோட்டார் வாகன தயாரிப்பாளர்கள் சங்கமான சியாம் வலியுறுத்தியுள்ள நிலையில், உள்நாட்டு உற்பத்தி அதிகரிப்பு மற்றும் மற்ற நாடுகளில் இருந்து அதிக இறக்குமதி ஆகியவற்றை அரசு பரிசீலித்து வருகிறது.

அரசு - தனியார் கூட்டு வாயிலாக காந்த உற்பத்தியை அதிகரிக்கவும் அரசு திட்டமிட்டுள்ளது.