வீட்டில் ரூ.40 லட்சம் கொள்ளை
வேலைக்காரர் மீது தொழிலதிபர் புகார்
சேலம், நவ. 7-
சேலம், அழகாபுரம், ஸ்வர்ணாம்பிகை தெருவை சேர்ந்தவர் ராகுல் பாட்டியா, 29. இவர், தந்தையுடன் சேர்ந்து குகை பகுதியில் துணி ஏற்றுமதி தொழில் செய்கிறார். கடந்த, 31ல் தீபாவளியையொட்டி பெங்களூரில் உள்ள மாமா வீட்டுக்கு சென்ற ராகுல் பாட்டியா, கடந்த, 3ல் திரும்பி வந்தார்.
இவர்களது வீட்டில் பீகாரை சேர்ந்த சந்தானகுமார், 21, வேலை பார்த்து வருகிறார். அவர் இரவில், ராகுல் பாட்டியா வீட்டிலேயே படுத்துக்கொள்வார்.
இந்நிலையில் ராகுல் பாட்டியா நேற்று அழகாபுரம் போலீசில் புகார் அளித்தார். அதில், 'கடந்த, 3 இரவு அனைவரும் துாங்கிய பின், பீரோ சாவியை எடுத்து திறந்து அதிலிருந்த, 40 லட்சம் ரூபாயை, சந்தானகுமார் திருடி சென்றார்' என கூறியிருந்தார். அதேநேரம், 40 லட்சம் ரூபாய்க்கு உரிய கணக்கு வழக்குகளை காட்டும்படி ராகுல் பாட்டியாவிடம் போலீசார் விசாரிக்கின்றனர். மேலும் சந்தானகுமாரை காணாததால் அவரையும் போலீசார் தேடுகின்றனர்.