புதுச்சேரி: புதுச்சேரியில் விமான சேவை துவங்கவுள்ள இண்டிகோ நிறுவனம் உதவியாளர் பணிக்கான நேர்காணலை லாஸ்பேட்டை விமான நிலையத்தில் நடத்தியது.

புதுச்சேரியில், ஸ்பைஸ் ஜெட் நிறுவனம் சார்பில் பெங்களூரு மற்றும் ஹைதராபாத்திற்கு விமான சேவை இயங்கி வந்தது. இந்நிலையில் கடந்த மார்ச் மாதம் முதல் ஸ்பைஸ் ஜெட் நிறுவனம் தனது சேவையை முடித்துக் கொண்டு வெளியேறியது. இந்நிலையில், ஒன்பது மாதங்களுக்குப் பிறகு அடுத்த மாதம் டிச. 20ம் தேதி முதல், பெங்களூரு மற்றும் ஹைதராபாத்திற்கு 72 பேர் செல்லக்கூடிய விமான சேவையை, இண்டிகோ நிறுவனம் துவங்க உள்ளது.

பெங்களூரில் இருந்து புறப்பட்டு புதுச்சேரி வரும் இண்டிகோ விமானம் ஐதராபாத்திற்கு சென்று மீண்டும் புதுச்சேரி திரும்பி, இங்கிருந்து பெங்களூரு சென்றடைகிறது.(ஏற்கனவே ஸ்பைஸ் ஜெட் நிறுவனம் இயக்கிய அதே சேவை) இண்டிகோ விமான சேவை நேரங்கள் விரைவில் வெளியாக உள்ளது.

இந்நிலையில் பயணிகளின் லக்கேஜ்களை எடுத்துச் செல்வது உள்பட பல்வேறு பணிகளை மேற்கொள்ளும் 10 உதவியாளர் பணியிடங்களுக்கான நேர்காணல் புதுச்சேரி லாஸ்பேட்டையில் உள்ள விமான நிலைய வளாகத்தில் நேற்று இண்டிகோ நிறுவன மனிதவள மேம்பாட்டு அதிகாரி தலைமையில் நடந்தது.

இதில் 45க்கும் மேற்பட்டோர் கலந்து கொண்டனர். மேலும் விமான சேவைக்காக விமான நிலையத்தை சுத்தப்படுத்தும்பணிகளும் நடந்தது.