சென்னை:வறுத்த நிலக்கடலை, உரங்கள் உள்ளிட்ட பொருட்களுக்கு, ஜி.எஸ்.டி.,யை, 5 சதவீதமாக குறைக்க வலியுறுத்தி, டில்லியில் ஜி.எஸ்.டி., கவுன்சில் கூடுதல் செயலரிடம், தமிழக உணவுப்பொருள் வியாபாரிகள் சங்க தலைவர் வேல்சங்கர், கவுரவ செயலர் சாய் சுப்ரமணியன், கவுரவ ஆலோசகர் ஜெயப்பிரகாசம் ஆகியோர் மனு அளித்துள்ளனர்.

மனுவில் கூறப்பட்டுஇருப்பதாவது:

வறுத்த நிலக்கடலைக்கு, 12 சதவீதமாக உள்ள ஜி.எஸ்.டி.,யை, 5 சதவீதமாகவும்; உரங்கள், பூச்சிக்கொல்லி மருந்து, நுண்ணுாட்ட உரங்களுக்கு ஒரே மாதிரியாக, 5 சதவீதமாக ஜி.எஸ்.டி.,யும் விதிக்க வேண்டும்.

உலர் பழங்களுக்கு, 12 சதவீதம் வரை உள்ள ஜி.எஸ்.டி.,யை 5 சதவீதமாக குறைக்க வேண்டும். ரஸ்க், புண்ணாக்கு, வேப்பம் புண்ணாக்கு, ஈர இட்லி, தோசை மாவு ஆகியவற்றுக்கு, 5 சதவீதமாக உள்ள ஜி.எஸ்.டி.,யை ரத்து செய்ய வேண்டும். வெண்ணெய்க்கு 12 சதவீதம், பிஸ்கட்டுக்கு 18 சதவீதமாக உள்ள ஜி.எஸ்.டி.,யை, 5 சதவீதமாக குறைக்க வேண்டும்.

வற்றல் வகைகளுக்கு, 5 சதவீதமாக உள்ள ஜி.எஸ்.டி.,யை ரத்து செய்வதுடன், 'நம்கின்ஸ்' எனப்படும் கார வகைகளுக்கு, 12 சதவீதமாக உள்ள ஜி.எஸ்.டி.,யை, 5 சதவீதமாக குறைக்க வேண்டும்.

இவ்வாறு அதில் கூறப்பட்டுள்ளது.