மதுரை : 'நகைக் கடன் பெறுவோர் ஆண்டு முடிவில் அசலையும் சேர்த்து செலுத்திய பின்பே, மறுஅடமானம் செய்து கடன் பெற முடியும்' என்ற உத்தரவு தொடர்பாக ரிசர்வ் வங்கி பதிலளிக்க உயர்நீதி மன்ற மதுரைக் கிளை உத்தரவிட்டுள்ளது.


மதுரை அவனியாபுரம் பிச்சைராஜன் தாக்கல் செய்த மனு: வங்கிகளில் இதுவரை நகைக் கடன்களை ஆண்டு முடிவில் வட்டியை மட்டும் திரும்ப செலுத்தி கடனை புதுப்பிக்கலாம். அசல் தொகையை செலுத்த வேண்டியதில்லை. வங்கி நகைக் கடன் தொடர்பாக ரிசர்வ் வங்கி தலைமை பொது மேலாளர் 2024 செப்.30-ல் சுற்றறிக்கை ஒன்றை பிறப்பித்துள்ளார்.


அதில், வட்டியுடன் அசல் தொகையை முழுமையாக செலுத்தி நகைகளை மீட்கவும், மறுநாள் மறு அடமானம் வைக்க வேண்டும் எனவும் கூறப்பட்டுள்ளது. நகை அடமான கடன் பெற்றவர்கள் முழுத்தொகையையும் செலுத்தி நகைகளை திருப்ப வேண்டிய கட்டாயம் ஏற்பட்டுள்ளது.



இந்த சுற்றறிக்கைபடி ஒரு நபர் 5 முறை மட்டுமே நகைக் கடன் பெற இயலும். இந்த பாகுபாடு அரசியலமைப்பு சட்டத்துக்கு எதிரானது. சாதாரண ஏழை மக்கள் நகைக் கடன் பெரும் உதவியாக உள்ளது.



இதை கருத்தில் கொள்ளாமல் ரிசர்வ் வங்கி பிறப்பித்துள்ள சுற்றறிக்கை சட்ட விரோதமானது. தங்க நகைக் கடன் தொடர்பாக ரிசர்வ் வங்கி தலைமைப் பொது மேலாளர் பிறப்பித்துள்ள சுற்றறிக்கையை செல்லாது என உத்தரவிட வேண்டும். இவ்வாறு கூறப்பட்டிருந்தது.



நீதிபதிகள் ஜெ.நிஷா பானு, எஸ்.ஸ்ரீமதி அமர்வு விசாரித்து, மனு தொடர்பாக ரிசர்வ் வங்கி தலைமைப் பொது மேலாளர் பதிலளிக்க உத்தரவிட்டு விசாரணையை 8 வாரங்களுக்கு ஒத்திவைத்தது.