ஜலந்தர்: பஞ்சாபில் பா.ஜ., தலைவர் வீட்டின் வெளியே குண்டு வெடித்தது போன்ற சத்தம் கேட்ட சம்பவம் அதிர்ச்சியை ஏற்படுத்தி உள்ளது.



இதுபற்றிய விவரம் வருமாறு;


பஞ்சாப் மாநிலம் ஜலந்தரில் பா.ஜ., தலைவர் மனோ ரஞ்சன் காலியா வீடு உள்ளது. அவரின் வீட்டுக்கு வெளியே நள்ளிரவு 1.00 மணியளவில் பலத்த வெடிச்சத்தம் கேட்டுள்ளது. ஆரம்பத்தில் இதை எதோ இடி சத்தம் என்று எண்ணி தவறாக நினைத்துள்ளார். அதன் பின்னர் சந்தேகம் கொண்டு போலீசாருக்கு தகவல் தெரிவித்துள்ளார்.


தகவலறிந்த போலீசார், சம்பவ இடத்திற்கு விரைந்து சென்றனர். தடயவியல் துறையினருக்கும் தகவல் அளிக்கப்பட அவர்களும் நேரில் சென்று நடந்த சம்பவம் குறித்து கேட்டறிந்தனர்.


இதுகுறித்து ஜலந்தர் போலீஸ் கமிஷனர் தன்பிரீத் கவுர் கூறியதாவது; நள்ளிரவு 1 மணிக்கு இங்கு குண்டுவெடிப்பு சம்பவம் நிகழ்ந்ததாக எங்களுக்கு தகவல் கிடைத்தது. உடனடியாக சம்பவ பகுதியில் நாங்கள் விசாரணை நடத்தினோம்.


தடயவியல் துறையினரும் தடயங்களை சேகரித்துள்னர். சி.சி.டி.வி., கேமராவில் பதிவாகி உள்ள காட்சிகளையும் பார்வையிட்டு வருகிறோம். கையெறி குண்டு தாக்குதலா அல்லது வேறு ஏதேனும் ஒரு சம்பவமா என விசாரணை நடத்தி வருகிறோம்.


இவ்வாறு அவர் கூறினார்.


சம்பவம் குறித்து மனோரஞ்சன் காலியா கூறுகையில், நள்ளிரவு 1 மணி அளவில் தூங்கி கொண்டிருந்தேன். அப்போது குண்டுவெடிப்பு ஏற்பட்டது. இதை இடி சத்தம் என்று நினைத்தேன். பின்னர் குண்டுவெடிப்பாக இருக்கும் என்று சந்தேகப்பட்டு போலீசுக்கு தகவல் தெரிவித்தேன் என்றார்.