தமிழக கல்குவாரி, கிரஷர் மற்றும் லாரி உரிமையாளர் சங்கம் சார்பில், 24 அம்ச கோரிக்கைகளை வலியுறுத்தி, இன்று முதல் தமிழகம் முழுதும் கால வரையற்ற வேலை நிறுத்தம் அறிவிக்கப்பட்டுள்ளது.

தமிழகம் முழுதும் உரிய அங்கீகாரம் பெற்று, 3,000 கல்குவாரிகள், 3,000க்கும் மேற்பட்ட கிரஷர் யூனிட்கள் இயங்கி வருகின்றன. இத்தொழிலில், 40,000 வாகனங்கள் ஈடுபடுத்தப்படுகின்றன. குவாரிகளில் இருந்து தினம் சராசரியாக, 50 யூனிட் அடிப்படையில், 2 லட்சம் யூனிட் கனிமங்கள் கொண்டு செல்லப்படுகின்றன. இதன் உத்தேச மதிப்பு, யூனிட்டுக்கு 5,000 ரூபாய் என்ற அளவில், 100 கோடி ரூபாய் அளவில் வர்த்தகம் நடைபெறுகிறது. வேலை நிறுத்தத்தால் இது பாதிக்கப்படும்.நேரடியாகவும் மறைமுகமாகவும் தொழிலில் ஈடுபட்டுள்ள வர்த்தகர்கள் மற்றும் தொழிலாளர்கள் பாதிக்கப்படுவர். மேலும், கட்டுமான பணிகளுக்கான கருங்கல், கிரஷர் ஜல்லி, எம் - சாண்ட் ஆகியன கிடைக்காமல் கட்டுமான பணிகள் முற்றிலும் பாதிக்கப்படும் அபாயம் உள்ளது.

தமிழகம் - கர்நாடக மாநிலங்களுக்கு இடையே தக்காளி, பீட்ரூட், கேரட், முட்டைகோஸ், காலிபிளவர் போன்ற காய்கறிகள் அனுப்பப்பட்டு வருகின்றன. கர்நாடகாவில் இருந்து, ஆப்பிள், ஆரஞ்சு, சாத்துக்குடி, மாதுளை உட்பட பல்வேறு வகையான பழங்கள், தமிழகத்திற்கு கொண்டு வரப்படுகின்றன.

மஹாராஷ்டிரா மாநிலத்தில் இருந்து, கர்நாடகா வழியாக தான், மக்காச்சோளம், வெங்காயம், பூண்டு, எண்ணெய், பருப்பு போன்ற பல்வேறு வகையான பொருட்கள் தமிழகத்திற்கு வருகின்றன. இதே நிலை தொடர்ந்தால், உணவு பொருட்களுக்கு தட்டுப்பாடு ஏற்பட்டு, விலை பலமடங்கு உயரும் அபாயம் உள்ளது.