திருத்தணி:திருத்தணி நகராட்சியில் உள்ள 54 பூங்காக்களின் நிலத்தை ஆக்கிரமிப்பதற்கு முன், நகராட்சி நிர்வாகம் பூங்கா இடத்தை அளந்து, தடுப்பு வேலி மற்றும் அறிவிப்பு பலகை வைத்து, பராமரிக்க வேண்டும் என, நகராட்சி மக்கள் மற்றும் சமூக ஆர்வலர்கள் எதிர்பார்க்கின்றனர்.

திருவள்ளூர் மாவட்டம், திருத்தணி நகராட்சியில் உள்ள 21 வார்டுகளில், 14,000க்கும் மேற்பட்ட குடும்பத்தினர் வசித்து வருகின்றனர். ஆனால், நகர மக்கள் பொழுதுபோக்கிற்கு பூங்கா இல்லாமல் இருந்தது.

நகராட்சி அலுவலகம் அருகே இருந்த ஒரெயொரு பொல்லரி முனுசாமி நாயுடு பூங்காவும் போதிய பராமரிப்பு இல்லாமல் இருந்தது. கடந்த 2021ம் ஆண்டு பொல்லரி முனுசாமி நாயுடு பூங்கா, நகராட்சி நிர்வாகம் சார்பில், 25 லட்சம் ரூபாயில் சீரமைக்கப்பட்டு பயன்பாட்டிற்கு விடப்பட்டது.

மேலும், நகராட்சி நிர்வாகம், 21 வார்டுகளில் பூங்காவுக்கான இடங்கள் குறித்து ஆய்வு செய்ததில், மொத்தம் 53 பூங்கா இடங்கள் உள்ளது தெரிய வந்தது. இதில், ஒன்பது பூங்கா இடத்தை தனிநபர்களால் ஆக்கிரமிக்கப்பட்டது தெரிய வந்தது.

தொடர்ந்து, 2022ம் ஆண்டு வாரியார் நகர், காந்தி நகர், நல்லதண்ணீர் குளக்கரை, ஆதிசங்கரர் நகர், பி.எம்.எஸ்., நகர், அமிர்தாபுரம் மற்றும் சுப்ரமணியபுரம் ஆகிய ஏழு பூங்காக்கள் ஆக்கிரமிப்பில் இருந்து மீட்டு, தடுப்பு வேலி அமைத்தும், நடைபாதை, விளையாட்டு கருவிகள் அமைத்து பயன்பாட்டிற்கு விடப்பட்டன.

இதுதவிர பாலாஜிநகர், சுப்பிரணியபுரம் ஆகிய இரு இடங்களில், 1.50 கோடி ரூபாய் மதிப்பிலான பூங்கா இடத்தை தனிநபர்கள் ஆக்கிரமித்தனர். பின், நகராட்சி நிர்வாகம் பூங்கா இடத்தை மீட்டது.

ஆனாலும், தனிநபர்கள் நீதிமன்றத்தில் வழக்கு தொடர்ந்துள்ளதால், பூங்காக்களை சீரமைப்பதில் காலதாமதம் ஆகிறது. மீதமுள்ள, 44 பூங்கா இடங்கள் காலி நிலமாகவே உள்ளன. இந்த இடங்களுக்கு நகராட்சி நிர்வாகம் தடுப்பு வேலி, அறிவிப்பு பலகை அமைக்காமல் உள்ளது.

இதனால், பூங்காக்களின் இடத்தை ஆக்கிரமிப்பதற்கு அதிக வாய்ப்புகள் உள்ளன. எனவே, நகராட்சி பூங்கா இடத்தை சுற்றிலும் இரும்பு கம்பிகளால் தடுப்புகள் ஏற்படுத்தியும், 'நகராட்சி பூங்கா' என, அறிவிப்பு பலகை வைத்தும் பராமரிக்க வேண்டும் என, பகுதிவாசிகள் எதிர்பார்க்கின்றனர்.

இதுகுறித்து திருத்தணி நகராட்சி அதிகாரி கூறியதாவது:

திருத்தணி நகராட்சியில், மொத்தம் 54 பூங்கா இடங்கள் உள்ளன. தற்போது, எட்டு பூங்காக்கள் பொதுமக்கள் பயன்பாட்டிற்கு கொண்டு வந்துள்ளோம். இரண்டு பூங்கா இடம் ஆக்கிரமிப்பில் இருந்து மீட்டுள்ளோம். தனிநபர் நீதிமன்றத்தில் வழக்கு தொடர்ந்துள்ளதால், பூங்கா சீரமைப்பு பணிகள் தாமதமாகிறது.

இதுதவிர நகராட்சியில், சத்தியசாய் நகர், அரசு மருத்துவமனை பின்புறம், குமரன்நகர், சேகர்வர்மா நகர், பாலாஜி நகர், ஏ.கே.எஸ். கார்டன், மங்கலகீழார் நகர், திருத்தணிகை நகர் உட்பட 21 வார்டுகளில், 44 பூங்கா இடங்கள் உள்ளன.

பூங்கா இடத்தை ஆக்கிரமிப்பாளர்களிடம் இருந்து பாதுகாக்க, விரைவில் தடுப்பு வேலி, அறிவிப்பு பலகை வைக்க உள்ளோம்.

இவ்வாறு அவர் கூறினார்.