நெய்வேலி; கடலுார் மாவட்டம், என்.எல்.சி.,யில் அங்கீகாரம் பெற்ற சங்கமாக திகழும் தொ.மு.ச., தொழிற்சங்கத்தில் 3,666 நிரந்தர தொழிலாளர்கள் உறுப்பினர்களாக உள்ளனர். 3 ஆண்டுகளுக்கு ஒரு முறை நடத்தப்பட்ட தொ.மு.ச., சங்க நிர்வாகிகள் தேர்தல் இனி, இரண்டு ஆண்டுகளுக்கு ஒரு முறை நடக்கும் என, தொ.மு.ச., பேரவை அறிவித்தது.

அதன்படி புதிய தலைவர், பொதுச் செயலாளர், பொருளாளர், அலுவலக செயலாளர், 16 துணைத் தலைவர்கள், 23 பகுதி செயலாளர்கள், 116 செயற்குழு உறுப்பினர்கள் உள்ளிட்ட 159 பதவிக்கான உட்கட்சி தேர்தல் நேற்று நடந்தது.

என்.எல்.சி., நிலக்கரி சுரங்கங்கள், அனல்மின் நிலையங்கள் மற்றும் அலுவலக பகுதிகள் உள்ளிட்ட 14 இடங்களில் ஓட்டுச்சாவடிகள் அமைக்கப்பட்டன. காலை 5:00 மணிக்கு துவங்கிய ஓட்டுப்பதிவு மாலை 5:30 மணிக்கு முடிந்தது.

மொத்தம் உள்ள 3,666 உறுப்பினர்களில் 3,597 பேர் ஓட்டளித்தனர். 98.11 சதவீதம் ஓட்டுகள் பதிவானது. தேர்தல் முடிந்து, நெய்வேலி டவுன்ஷிப் வட்டம் 9ல் உள்ள என்.எல்.சி., பள்ளிக்கு ஓட்டு பெட்டிகள் போலீஸ் பாதுகாப்புடன் கொண்டு செல்லப்பட்டது.