கள்ளக்குறிச்சி: கனியாமூரில் புதிய தார்சாலை அமைக்கும் பணிக்கான பூமிபூஜை நடந்தது.

நிகழ்ச்சிக்கு, ஒன்றிய சேர்மன் சத்தியமூர்த்தி தலைமை தாங்கினார். ஊராட்சி தலைவர் முருகேசன் முன்னிலை வகித்தார். மூலதன முதலீட்டு மாநிலங்களுக்கான சிறப்பு உதவி திட்டத்தின் கீழ் கனியாமூரில் இருந்து ராயர்பாளையம் வரை 1.25 கி.மீ., தொலைவிற்கு புதிய தார் சாலை அமைக்க 59 லட்சம் ரூபாய் நிதி ஒதுக்கீடு செய்யப்பட்டது. தொடர்ந்து, பணிகள் துவங்குவதற்கான பூமிபூஜை நடந்தது.

ஒன்றிய சேர்மன் சத்தியமூர்த்தி அடிக்கல்நாட்டி பணிகளை துவக்கி வைத்தார். அதேபோல், பங்காரத்தில் இருந்து உலகங்காத்தான் வரை 4 கி.மீ., தொலைவிற்கு 2.39 கோடி ரூபாய் மதிப்பில் புதிய தார்சாலை பணிகளும் துவங்கப்பட்டது.

நிகழ்ச்சியில், பணி மேற்பார்வையாளர் வெங்கடேசன், வழக்கறிஞர் சங்க தலைவர் சேகர், ஒன்றிய கவுன்சிலர் கோவிந்தராஜ், ஊராட்சி துணைத்தலைவர் சுகுணா வீராசாமி, தி.மு.க., கிளை செயலாளர்கள் ராஜிவ்காந்தி, ராஜா உட்பட பலர் பங்கேற்றனர்.