ஈரோடு:ஈரோடு, தோட்டக்கலை துணை இயக்குனர் குருசரஸ்வதி வெளியிட்டுள்ள செய்திக்குறிப்பு:

அறுவடைக்கு தயாராக உள்ள தோட்டங்களில் அறுவடை செய்தும், மரங்களை கவாத்து செய்து மரத்தின் சுமையை குறைத்து காற்றால் சேதத்தை தவிர்க்கலாம். கனமழையின்போது ஏற்படும் மழை நீர் தேக்கத்தை குறைக்க, உபரி நீர் வடிந்த பின் நடவு, விதைப்பு பணி செய்யலாம். வடிகால் வசதியற்ற நிலங்களில், வடிகால் வாய்க்கால் அமைத்து மழை நீர் தேங்குவதை தவிர்க்கலாம்.
காற்றால் ஏற்படும் சேதம் தவிர்க்க, காற்று வீசும் திசைக்கு எதிர் திசையில் குச்சிகளால் முட்டு கொடுக்கலாம். மழை நீர் வடிந்த பின், பயிருக்கு ஏற்ப மேலுரம் இட்டு, மண் அணைக்க வேண்டும். இலை வழி உரமிட்டு பயிரின் ஊட்டச்சத்து தேவையை சரி செய்யலாம்.

தாங்கு குச்சி கட்ட வேண்டும்

பசுமை குடிலின் அடிப்பாகம் பலமாக, நிலத்துடன் இணைப்பு கம்பியை இணைத்து உறுதி செய்யலாம். பசுமை குடிலின் உள்பகுதியில் காற்று உட்புகும் பகுதி இல்லாததை உறுதி செய்து, கதவுகள், ஜன்னல்கள் பத்திரமாக மூட வேண்டும். மா மரத்தில் காய்ந்த, பட்டுப்போன கிளைகளை அகற்றி, மரத்தின் அடிப்பகுதியில் மண் அணைத்து, குவித்து உரிய வடிகால் வசதி செய்து, நோய் தடுப்பு மருந்து தெளிக்க வேண்டும். சிறிய செடிகளை காற்றால் பாதிக்காதபடி தாங்கு குச்சி கட்ட வேண்டும்.

நோய் தடுப்பு மருந்து

கொய்யா செடியை கவாத்து செய்து, பூஞ்சாண நோய்களை தடுக்க நோய் தடுப்பு மருந்து தெளிக்கலாம். நல்ல மிளகு செடிகளில், பூஞ்சாண நோய்களை தடுக்க சூடோமோனாஸ் தெளிக்க வேண்டும். டிரைகோடெர்மா விரிடி, சூடோமோனாஸ் பூஞ்சாண உயிரியல் கொல்லிகளை நிலத்தில் தெளித்து, செடிகளை கட்டிவிட வேண்டும்.

காய்ந்த இலைகளை அகற்ற வேண்டும்

வாழை மரத்தை சவுக்கு, யூகலிப்டஸ் கம்புகள் ஊன்றியும், வாழைத்தாரை முறையாக மூடி, 75 சதவீதத்துக்கு மேல் முதிர்ந்த தாரை அறுவடை செய்யலாம். காய்கறிகளில் தக்காளி, கத்திரி, மிளகாய், வெண்டை, வெங்காய செடிகளில் வடிகால் வசதி செய்து, ஊன்று கோல் கொடுத்து, நோய் தடுப்பு மருந்து தெளித்து, உயிரியல் கொல்லிகளை தெளித்திட வேண்டும். மரவள்ளி, மஞ்சள் செடிக்கும் வடிகால் வசதியுடன், செடியின் அடிப்பகுதியில் மண் அணைத்து, தண்டு பகுதியில் மண் குவிக்க வேண்டும். பந்தல் காய்கறி, சம்பங்கி, செண்டுமல்லி, சாமந்தி உள்ளிட்ட பூ செடிகளில் நோய் தடுப்பு மருந்து தெளித்து, காய்ந்த இலைகளை அகற்ற வேண்டும்.
இவ்வாறு தெரிவித்துள்ளார்.