சார்ஜா: முதல் ஒருநாள் போட்டியில் ஆப்கானிஸ்தான் அணி 92 ரன் வித்தியாசத்தில் வங்கதேசத்தை வீழ்த்தியது.

சார்ஜா சென்றுள்ள ஆப்கானிஸ்தான், வங்கதேச அணிகள், மூன்று போட்டி கொண்ட ஒருநாள் தொடரில் பங்கேற்கின்றன. முதல் போட்டியில் 'டாஸ்' வென்று முதலில் 'பேட்' செய்த ஆப்கானிஸ்தான் அணிக்கு ரஹ்மானுல்லா குர்பாஸ் (5), ரஹ்மத் ஷா (2) ஏமாற்றினர். கேப்டன் ஹஷ்மதுல்லா ஷாஹிதி (52), முகமது நபி (84) அரைசதம் கடந்து கைகொடுத்தனர். ஆப்கானிஸ்தான் அணி 49.4 ஓவரில் 235 ரன்னுக்கு 'ஆல்-அவுட்' ஆனது. வங்கதேசம் சார்பில் டஸ்கின் அகமது, முஸ்தபிஜுர் ரஹ்மான் தலா 4 விக்கெட் வீழ்த்தினர்.
எட்டக்கூடிய இலக்கை விரட்டிய வங்கதேச அணிக்கு சவுமியா சர்க்கார் (33), கேப்டன் நஜ்முல் ஹொசைன் ஷான்டோ (47), மெஹிதி ஹசன் மிராஸ் (28) ஓரளவு கைகொடுத்தனர். மஹ்முதுல்லா (2), முஷ்பிகுர் ரஹிம் (1) உள்ளிட்டோர் ஏமாற்ற, வங்கதேச அணி 34.3 ஓவரில் 143 ரன்னுக்கு சுருண்டு தோல்வியடைந்தது. ஆப்கானிஸ்தான் சார்பில் 'ஸ்பின்னர்' கசன்பர் 6 விக்கெட் சாய்த்தார்.