கள்ளக்குறிச்சி: உளுந்துார்பேட்டை அரசு தொழிற்பயிற்சி நிலைய வளாகத்தில் வரும் 11ம் தேதி தொழிற்பழகுநர் பயிற்சி சேர்க்கை முகாம் நடக்கிறது.

கலெக்டர் பிரசாந்த் செய்திக்குறிப்பு:

தேசிய தொழிற்பழகுநர் பயிற்சி அபிவிருத்தி திட்டத்தின்கீழ், தொழிற்பழகுநர் பயிற்சி சேர்க்கை முகாம், உளுந்துார்பேட்டை அரசு ஐ.டி.ஐ., வளாகத்தில் வரும் 11ம் தேதி காலை 9:00 முதல் மாலை 4:00 மணி வரை நடக்கிறது.

இம்முகாமில், அரசு போக்குவரத்துக் கழகம், மின் உற்பத்தி மற்றும் பகிர்மான கழகம் மற்றும் ஆவின் போன்ற அரசு பொதுத்துறை நிறுவனங்கள், சர்க்கரை உற்பத்தி நிறுவனங்கள், சிறு, குறு மற்றும் நடுத்தர தொழில் முன்னனி நிறுவனங்கள் 1000க்கும் மேற்பட்ட இடங்களை நிரப்ப உள்ளனர்.

ஐ.டி.ஐ., முடித்தவர்கள் பயிற்சியில் சேர்ந்து தொழிற்பழகுநர் சான்றிதழ் பெறலாம். மேலும் ஐ.டி.ஐ., சேர்ந்து பயிற்சி பெற முடியாத 10ம் வகுப்பு மற்றும் அதற்கு மேலும் கல்வி தகுதியுடையவர்கள் நேரடியாக தொழிற்சாலைகளில் புதிய பயிற்சியாளர்களாக சேர்ந்து 3 முதல் 6 மாதகால அடிப்படை பயிற்சி பெறலாம்.

பயிற்சி தொடர்பான விபரங்களுக்கு உதவி இயக்குனர், மாவட்ட திறன் பயிற்சி அலுவலகம், விழுப்புரம் மற்றும் கள்ளக்குறிச்சி, 04146-294989 என்ற தொலைபேசி எண்ணிலும், மண்டல பயிற்சி இணை இயக்குனர், விழுப்புரம், 04146-250573 என்ற தொலைபேசி எண்ணிலும் தொடர்பு கொள்ளலாம்.

இவ்வாறு செய்திக்குறிப்பில் கூறப்பட்டுள்ளது.