கோவை:கோவை ஆர்.எஸ்.புரம் பகுதியை சேர்ந்தவர் கோவை செல்வராஜ், 66. கடந்த, 1991 - 96 அ.தி.மு.க., ஆட்சியில், கோவை மேற்கு தொகுதி காங்., எம்.எல்.ஏ.,வாக இருந்தார். காங்., கட்சியில் இருந்து அ.தி.மு.க.,வுக்கு சென்றார்.

பன்னீர்செல்வம் ஆதரவாளராக இருந்த அவர், 2022ல் தி.மு.க.,வுக்கு தாவினார். செய்தி தொடர்பு துணை செயலராக செயல்பட்டு வந்தார்.

இவருக்கு மனைவி, மூன்று மகன்கள். இரு மகன்களுக்கு ஏற்கனவே திருமணமாகி விட்டது. மற்றொரு மகனுக்கு நேற்று திருப்பதியில் திருமண வரவேற்பு நிகழ்ச்சி நடந்தது.

அனைத்து நிகழ்ச்சிகளையும் முடித்து விட்டு, மணமக்கள் மற்றும் இரு வீட்டாரின் பெற்றோர், கோவை திரும்புவதற்கு, திருப்பதி மலையில் இருந்து காரில் இறங்கினர்.

அப்போது, கோவை செல்வராஜுக்கு மாரடைப்பு ஏற்பட்டது. மருத்துவமனைக்கு அழைத்து செல்லும் வழியில் உயிரிழந்தார். அவரது உடல், கோவை எடுத்து வரப்படுகிறது.