கூடுவாஞ்சேரி:நந்திவரம் - கூடுவாஞ்சேரி நகராட்சி, நந்திவரம் சிறிய தாங்கல் ஏரிக்கரையில், லேசான காற்று வீசினாலே சாய்ந்து விழும் நிலையில் மின்கம்பங்கள் சாய்ந்த நிலையில் உள்ளன.

மேலும், இந்த மின்கம்பத்தின் இரும்பு கம்பிகள் துருப்பிடித்து, சிமென்ட் பூச்சு உதிர்ந்து, ஆபத்தான நிலையில் ஒன்றுக்கும் மேற்பட்ட மின் கம்பங்கள் உள்ளன.

சிறிய தாங்கல் ஏரிக்கரை வழியாக, தினமும் 1,000க்கும் மேற்பட்டோர் சென்று வருகின்றனர். தற்போது, மழைக்காலம் துவங்க இருப்பதால், மின்கம்பங்கள் விழுந்து, உயிர்ச்சேதம் ஏற்படும் அபாய நிலை உள்ளது.

எனவே, மின்விபத்து ஏற்படுவதற்கு முன், சேதமான மின்கம்பங்களை அகற்றிவிட்டு, புதிதாக அமைக்க மாவட்ட நிர்வாகம் மற்றும் மின்வாரிய அதிகாரிகள் உரிய நடவடிக்கை எடுக்க வேண்டும் என, அப்பகுதியினர் கோரிக்கை விடுத்துள்ளனர்.