சென்னையின் குடிநீர் தேவைக்காக, கண்டலேறு அணையில் இருந்து ஆண்டுதோறும் 12 டி.எம்.சி., கிருஷ்ணா நீரை, சாய்கங்கை கால்வாயில், ஆந்திர அரசு திறக்க வேண்டும். இந்த நீர் பூண்டி ஏரிக்கு எடுத்துவரப்பட்டு, அங்கிருந்து கால்வாய் வழியாக புழல், செம்பரம்பாக்கம் நீர் சுத்திகரிப்பு நிலையங்களுக்கு அனுப்படுகிறது. இங்கு சுத்திகரிக்கப்பட்ட நீர், சென்னையின் குடிநீர் தேவைக்கு பயன்படுத்தப்படுகிறது. ஸ்ரீபெரும்புதுாரில் உள்ள தொழிற்சாலைகளின் நீர் தேவையும் தீர்க்கப்படுகிறது. ஆனால் கிருஷ்ணா நீரை, ஆந்திர அரசு முறைப்படி வழங்குவது கிடையாது. கடந்தாண்டு, 2.41 டி.எம்.சி., மட்டுமே நீர் திறக்கப்பட்டது. நடப்பு 2024 - 25ம் ஆண்டு நீர் வழங்கும் காலத்தில் 1.23 டி.எம்.சி., நீர் மட்டுமே கிடைத்துள்ளது. நேற்று காலை நிலவரப்படி, ஊத்துக்கோட்டை ஜீரோ பாயின்ட் எல்லையை கடந்து, ஆந்திராவில் இருந்து தமிழகத்திற்கு வினாடிக்கு 219 கனஅடி நீர் கிடைத்தது. இதில், நீர்பிடிப்பு பகுதிகளில் பெய்த மழைநீரும் அடக்கம்.

ஏரி மொத்த கொள்ளளவு நீர்இருப்பு (டி.எம்.சி.,)பூண்டி 3.23 0.46புழல் 3.30 2.40சோழவரம் 1.08 0.11செம்பரம்பாக்கம் 3.64 1.88தேர்வாய்கண்டிகை 0.50 0.30வீராணம் 1.46 0.89

சென்னையின் குடிநீர் தேவையை கருதி எடுக்கப்பட்டு வரும் நடவடிக்கைகளின் கீழ், கிழக்கு கடற்கரை சாலையில் உள்ள பேரூரில், 4276.44 கோடி ரூபாய் கடல்நீரை குடிநீராக்கும் திட்ட பணிகள் நடந்து வருகின்றன. இதுகுறித்து, சென்னை குடிநீர் வாரியம் வெளியிட்ட அறிக்கை:சென்னை மாநகரின் நீண்ட நாள் குடிநீர் தேவை மற்றும் மக்களின் அன்றாட குடிநீர் தேவையை கருதி, பல்வேறு நடவடிக்கை எடுக்கப்பட்டுள்ளது.அதன்படி, ஜப்பான் பன்னாட்டு கூட்டுறவு முகமை நிதியுதவுடன், பேரூரில் 4,276.44 கோடி ரூபாய் மதிப்பில், தினமும் 40 கோடி லிட்டர் திறன் கொண்ட கடல்நீரை குடிநீராக்கும் திட்ட பணிகள் நடந்து வருகிறது. இதற்கான கட்டுப்பான பணிகள் முழு வீச்சில் நடந்து வருகிறது.


இப்பணிகளைகுடிநீர் வாரிய மேலாண்மை இயக்குனர் வினய் நேற்று ஆய்வு செய்தார். கடல்நீரை உட்கொள்ளும் கட்டமைப்பு, செதிலடுக்கு தொட்டி, சவ்வூடு வெளியேற்றும் தெளிந்த நீர் தொட்டி, நடுநிலைப்படுத்தும் தொட்டி, நீர் சேகரிப்பு தொட்டி, சுத்திகரிக்கப்பட்ட நீர் சேகரிப்பு தொட்டி, கசடுகளை கெட்டிப்படுத்தும் தொட்டி, நிர்வாக கட்டடம் உள்ளிட்டவை அமைக்கும் பணிகள் நடந்து வருகின்றன.மேலும், கடல் நீரை குடிநீராக்க, கடலுக்குள் 1.15 கி.மீ., நீளத்திற்கு குழாய் பதிக்கப்படுகிறது. அத்துடன், இந்நிலையத்தில் இருந்து போரூர் வரை 59 கி.மீ., நீளத்திற்கு குடிநீர் குழாய் பதிக்கப்படும். இத்திட்டத்தில் சென்னை, தாம்பரம் மாநகராட்சிகள், சென்னை அருகாமையில் உள்ள, 20 ஊராட்சி பகுதிகளில், 22.67 லட்சம் மக்கள் பயனடைவர்.இவ்வாறு அதில் கூறப்பட்டுள்ளது.