உத்திரமேரூர்:உத்திரமேரூரில் இருந்து காஞ்சிபுரம் செல்லும் சாலையோரத்தில், மின் வாரியத்தால், 10க்கும் மேற்பட்ட மின்கம்பங்கள் நடப்பட்டு, அப்பகுதி குடியிருப்புகளுக்கு, மின் கம்பிகள் வாயிலாக மின்சாரம் செல்கின்றன.

தற்போது, திடக்கழிவு மேலாண்மை கிடங்கின் அருகே உள்ள மின்கம்பம் சேதமடைந்து, சிமென்ட் பூச்சுகள் உதிர்ந்து, கம்பிகள் வெளியே தெரிகின்றன.

இதனால், சேதமடைந்த மின்கம்பம் எந்த நேரத்திலும் விழும் என்பதால், அவ்வழியே செல்லும் வாகன ஓட்டிகள் அச்சத்துடனேயே சென்று வருகின்றனர்.

எனவே, சாலையோரத்தில் உள்ள சேதமடைந்த மின்கம்பத்தை அகற்ற நடவடிக்கை எடுக்க வேண்டும் என, வாகன ஓட்டிகள் கோரிக்கை விடுத்துள்ளனர்.