திருவள்ளூர்:திருமழிசை பேரூராட்சியில் 15 வார்டுகளில் 130க்கும் மேற்பட்ட தெருக்களில் ஆறாயிரத்துக்கும் மேற்பட்ட குடியிருப்புகளில் 18 ஆயிரத்துக்கும் மேற்பட்டோர் வசித்து வருகின்றனர்.

இங்குள்ள 15 வார்டுகளில் பல பகுதிகளில் சாலைகள் சேதமடைந்து மிகவும் மோசமான நிலையில் உள்ளது.

குறிப்பாக பேரூராட்சி அலுவலகம் அருகே உள்ள 10வது வார்டுக்குட்பட்ட ஜவகர் தெரு ஆகிய பகுதிகளில் பல்லாங்குழியான சாலையால் பகுதிவாசிகள் அச்சத்துடன் சென்று வருகின்றனர்.

இதேபோல் 3வது வார்டுக்குட்பட்ட பகுதியிலும் சாலைகள் மோசமான நிலையில் உள்ளது.

அவசர மருத்துவ தேவைக்கு ஆம்புலன்ஸ் கூட வர முடியாமல் பகுதிவாசிகள் கடும் சிரமப்பட்டு வருகின்றனர்.

எனவே, சம்பந்தப்பட்ட அதிகாரிகள் பேரூராட்சியில் சாலைகளை சீரமைக்க வேண்டுமென பகுதிவாசிகள் கோரிக்கை விடுத்துள்ளனர்.