கம்பம்: தேனி மாவட்டம், கம்பம், பாரதியார் நகரைச் சேர்ந்தவர் முத்துக்குமார், 42; அடிமாடுகளை வாங்கி கேரளாவில் இறைச்சிக்காக விற்பனை செய்யும் தொழில் செய்தார். இவரது லாரியை கம்பமெட்டு காலனியில் வசிக்கும், அவரது நண்பர் சதாம் உசேன், 32, ஓட்டி வந்தார்.

இவரும் அடிமாடுகளை வாங்கி விற்கும் தொழில் செய்தார். இருவருக்கும் பணம் கொடுக்கல், வாங்கல் பிரச்னை இருந்தது. போலீசார் சமாதானம் செய்தும் தகராறு தொடர்ந்தது.

நேற்று முன்தினம் முத்துக்குமார், சதாம் உசேனை தாக்கினார். அங்கிருந்தவர்கள் இருவரையும் சமாதானம் செய்து அனுப்பினர்.

ஆத்திரமடைந்த சதாம் உசேன், நேற்று அதிகாலை, 3:00 மணியளவில் கம்பம் -- குமுளி பைபாஸ் ரோட்டில் ஒர்க் ஷாப் ஒன்றில் படுத்திருந்த முத்துக்குமாரை, அரிவாளால் சரமாரியாக வெட்டினார். பலத்த காயமடைந்த முத்துக்குமார் சம்பவ இடத்திலேயே பலியானார்.

சதாம் உசேன், கம்பம் வடக்கு போலீசில் சரணடைந்தார். சம்பவம் நடந்த இடம் உத்தமபாளையம் போலீஸ் எல்லைக்குள் வருவதால் சதாம் உசேன் அங்கு ஒப்படைக்கப்பட்டார்.