புதுடில்லி :டில்லியின் முதல்வராக பா.ஜ.,வைச் சேர்ந்த ரேகா குப்தா, 50, நேற்று பதவியேற்றார். அவருடன், ஆறு பேர் அமைச்சர்களாக பதவியேற்றனர். தேர்தல் பிரசாரத்தின்போது அறிவித்த, தகுதியுள்ள பெண்களுக்கு மாதம், 2,500 உதவித் தொகை வழங்கும் திட்டம், சர்வதேச மகளிர் தினமான, மார்ச், 8ம் தேதி முதல் அமலுக்கு வருவதாக, ரேகா குப்தா அறிவித்துள்ளார்.

தேசிய தலைநகர் டில்லி சட்டசபைக்கு கடந்த, 5ம் தேதி தேர்தல் நடந்தது. இதில், மொத்தமுள்ள 70 தொகுதிகளில், 48ல் வென்று பா.ஜ., ஆட்சியைப் பிடித்தது.

கடந்த, 10 ஆண்டாக ஆட்சியில் இருந்த ஆம் ஆத்மி, 22 தொகுதிகளில் வென்றது. அதன் தேசிய ஒருங்கிணைப்பாளரும், முன்னாள் முதல்வருமான அரவிந்த் கெஜ்ரிவால் புதுடில்லி தொகுதியில் தோல்வியடைந்தார்.

6 அமைச்சர்கள்

முதல்வராகும் வாய்ப்புள்ளதாக பலருடைய பெயர்கள் உலாவந்த நிலையில், யாரும் எதிர்பாராத வகையில், முதல் முறை எம்.எல்.ஏ.,வான ரேகா குப்தாவை அந்தப் பதவிக்கு, பா.ஜ., தலைமை அறிவித்தது.

ஆர்.எஸ்.எஸ்., மாணவர் அமைப்பில் இருந்துள்ள ரேகா குப்தா, கவுன்சிலர், மேயர் பதவிகளை வகித்துள்ளார். பா.ஜ.,விலும் இளைஞர் பிரிவு, பெண்கள் பிரிவில் பொறுப்புகளை வகித்துள்ளார். முதல் முறையாக எம்.எல்.ஏ.,வாகியுள்ள அவர், டில்லியின் ஒன்பதாவது முதல்வராக நேற்று பதவியேற்றார்.

அவருக்கு துணை நிலை கவர்னர் வி.கே. சக்சேனா பதவிப் பிரமாணம் செய்து வைத்தார். பிரதமர் நரேந்திர மோடி, பா.ஜ., தலைவர் நட்டா, மத்திய அமைச்சர்கள் அமித் ஷா, ராஜ்நாத் சிங் என, பலரும் பங்கேற்றனர்.

இதைத் தவிர, பா.ஜ., மற்றும் தேசிய ஜனநாயகக் கூட்டணி ஆளும் மாநிலங்களின் முதல்வர்கள், துணை முதல்வர்கள் உள்ளிட்டோரும் பங்கேற்றனர்.

டில்லி ராம்லீலா மைதானத்தில் நடந்த வண்ணமயமான நிகழ்ச்சியில், 50,000க்கும் மேற்பட்ட கட்சித் தொண்டர்களும் பங்கேற்றனர். ரேகாவுடன், 6 பேர் அமைச்சர்களாக பதவியேற்றனர். கெஜ்ரிவாலை தோற்கடித்த, முன்னாள் முதல்வர் ஷாஹிப் சிங் வர்மாவின் மகனான பர்வேஷ் வர்மா முதலில் பதவியேற்றார். இதைத் தவிர, கபில் மிஸ்ரா, மஜிந்தர் சிங் சிர்சா, ஆஷிஷ் சூட், ரவிந்தர் இந்த்ரஜ் சிங், பங்கஜ் குமார் சிங் ஆகியோரும் அமைச்சர்களாக பதவியேற்றனர்.

பிரதமர் வாழ்த்து

பதவியேற்பு விழாவைத் தொடர்ந்து சமூக வலைதளத்தில் பிரதமர் மோடி வெளியிட்டுள்ள பதிவில், 'அடிமட்டத்தில் இருந்து வந்துள்ள ரேகா குப்தா, பல்கலை, மாநில அளவில் அரசியல் பதவிகளை வகித்துள்ளார்.

'மாநகராட்சி நிர்வாகத்தில் பங்கேற்றுள்ள அவர் முதல் முறையாக எம்.எல்.ஏ.,வாகவும், முதல்வராகவும் பதவியேற்றுள்ளார். டில்லியின் ஒட்டுமொத்த வளர்ச்சிக்கு அவர் பணியாற்றுவார் என்றும், பலனளிக்கும் அரசை வழங்குவார் என்றும் முழுமையாக நம்புகிறேன்' என, பிரதமர் மோடி குறிப்பிட்டுள்ளார்.

பதவியேற்பு விழாவுக்கு முன், ரேகா குப்தா கூறியுள்ளதாவது:

பிரதமர் நரேந்திர மோடியின் கனவுகளை நிறைவேற்றுவதுதான், 48 எம்.எல்.ஏ.,க்களின் பொறுப்பாகும். கட்சியின் தேர்தல் வாக்குறுதிகளின்படி, பெண்களுக்கு மாதம், 2,500 ரூபாய் உதவித் தொகை வழங்கும் திட்டம் உடனடியாக நிறைவேற்றப்படும். சர்வதேச மகளிர் தினமான, மார்ச், 8ம் தேதி, டில்லி பெண்களின் வங்கிக் கணக்கில் முதல் தவணை செலுத்தப்படும்.

கடந்த, 10 ஆண்டுகளில் நடந்தவற்றுக்கு, ஆம் ஆத்மியை பொறுப்பாக்குவோம். டில்லி மக்களுக்கு அவர்கள் பதில் சொல்லியாக வேண்டும். ஒவ்வொரு காசுக்கும் அவர்களை பொறுப்பாக்குவோம்.

பிரதமர் மோடி கூறியுள்ளதுபோல், யமுனை நதியை துாய்மைப்படுத்துவதை முதன்மையான பணியாக செயல்படுத்துவோம். தேர்தல் வாக்குறுதிகள் அனைத்தும் நிறைவேற்றப்படும்.

இவ்வாறு அவர் கூறினார்.

பதவியேற்பு விழாவைத் தொடர்ந்து, புதிய முதல்வர் மற்றும் அமைச்சர்கள், சட்டசபைக்கு சென்றனர். அதிகாரிகளை சந்தித்து ஆலோசனை நடத்தினர். அங்கு முதல் அமைச்சரவை கூட்டமும் நடத்தப்பட்டது. மேலும், யமுனை நதிக்கரைக்குச் சென்று, ஆரத்தி நிகழ்ச்சிகளிலும் அவர்கள் பங்கேற்றனர்.

இதற்கிடையே, அமைச்சர்களுக்கான இலாகாக்கள் நேற்று மாலை ஒதுக்கப்பட்டன.