கலவை:ஹார்டுவேர் கடையில் ஏற்பட்ட தீ விபத்தில், சமையல் காஸ் சிலிண்டர் வெடித்ததில் தீயணைப்பு வீரர்கள் மூவர் உட்பட, 6 பேர் காயமடைந்தனர்.

ராணிப்பேட்டை மாவட்டம், கலவை பஜார் வீதியில் அல்தாப் ஹார்டுவேர், பெயின்ட் கடை இயங்கி வருகிறது. மூன்று மாடி கொண்ட அக்கடையில், கடை விரிவாக்க பணிக்காக வெல்டிங் பணி நேற்று நடந்தது.

அப்போது, வெல்டிங் மிஷினில் இருந்து தீப்பொறி பறந்து, அங்கு வைத்திருந்த சமையல் காஸ் சிலிண்டர் மீது பட்டு தீப்பிடித்தது. அதிர்ச்சியடைந்த ஊழியர்கள் தீயை அணைத்தும் முடியாததால், கலவை தீயணைப்பு துறையினர் தீயை அணைக்க தொடங்கினர்.

அவர்களாலும் முடியாததால், ராணிப்பேட்டை மற்றும் ஆற்காடு தீயணைப்பு துறையினர் வரவழைக்கப்பட்டு, தீயை அணைக்கும் பணியில் ஈடுபட்டனர். அப்போது சமையல் காஸ் சிலிண்டர் வெடித்ததில், மூன்று தீயணைப்பு வீரர்கள் உட்பட, 6 பேர் படுகாயமடைந்து, வாலாஜாபேட்டை அரசு மருத்துவமனையில் சேர்க்கப்பட்டனர். கலவை போலீசார் விசாரித்து வருகின்றனர்.