சென்னை: தொழில் உரிமம் புதுப்பிக்கும் அவகாசத்தை, மூன்று ஆண்டுகளுக்கு ஒரு முறை என மாற்றம் செய்யப்பட்டுள்ள நிலையில், மாநகராட்சி வருவாய்த் துறை அதிகாரிகள், வணிகர்களிடம், மூன்று மடங்கு கமிஷன் கேட்பதாக குற்றச்சாட்டு எழுந்துள்ளது.


சென்னை மாநகராட்சியில், சிறு, குறு முதல் பெரிய வியாபார கடைகள் வரை இயங்கி வருகின்றன. இதில், 67,000 கடைகள் மாநகராட்சியிடம் தொழில் உரிமம் பெற்று இயங்கி வருகின்றன. இதற்குமுன், தொழில் உரிமம் பெற குறைந்தபட்சமாக, 500 ரூபாய் முதல், 10,000 ரூபாய் வரை கட்டணம் வசூலிக்கப்பட்டு வந்தது.

அதன்படி, ஒவ்வொரு நிதியாண்டிலும், சிறிய கடைகள், உணவகங்கள், துணி கடைகள் உள்ளிட்டவை, தங்கள் கடைகளின் தன்மைக்கு ஏற்ப, உரிமம் கட்டணம் செலுத்த வேண்டும்.

அதேநேரம், ஒவ்வொரு ஆண்டும் புதுப்பிப்பதற்கு பதிலாக, குறைந்தபட்ச கால இடைவெளி வழங்க வேண்டும் என, வியாபாரிகளில் ஒரு தரப்பினர் கோரிக்கை வைத்தனர்.

கட்டணம் நிர்ணயம்

அதன் அடிப்படையிலும், தொழில் உரிமத்திற்கான அவகாசம், ஓராண்டில் இருந்து, மூன்றாண்டுகளாக அதிகரிக்கப்பட்டது. மேலும், பல ஆண்டுகளாக உயர்த்தப்படாமல் இருந்த சில தொழில்களுக்கு, 50 முதல் 100 சதவீதம் வரை தொழில் உரிம கட்டணம் கணிசமாக உயர்த்தப்பட்டு உள்ளது.



குறிப்பாக, வளர்ப்பு பிராணிகள், பறவைகள் கடைகளுக்கு, 20 ரூபாய் இருந்த தொழில் உரிம கட்டணம், 1,500 முதல், 10,000 ரூபாய் வரை என, பல மடங்கு உயர்த்தப்பட்டு உள்ளது.மேலும், சிறு, குறு கடைகளுக்கு, 3,500 ரூபாய் முதல் 7,000 ரூபாய்; சிறிய கடைகளுக்கு, 7,000 முதல் 10,000 ரூபாய்; நடுத்தர கடைகளுக்கு, 10,000 முதல் 20,000 ரூபாய்; பெரிய கடைகளுக்கு, 15,000 முதல் 50,000 ரூபாய் என, 500க்கும் மேற்பட்ட வியாபார கடைகள் பட்டியலிடப்பட்டு, கட்டணம் நிர்ணயிக்கப்பட்டு உள்ளது.



அதன்படி, மூன்றாண்டு கால தொழில் உரிமம் வழங்கும் பணியை மாநகராட்சி துவக்கி உள்ளது.மேலும், அமர்ந்து சாப்பிடக்கூடிய டீ கடை முதல் ஹோட்டல் வரை, சதுர அடி பரப்பளவு அடிப்படையில், 5,000 முதல் 15,000 ரூபாய் வரை; கேன்டீன், பாஸ்புட், ரெஸ்டாரன்ட் ஆகியவற்றும் சதுர அடி பரப்பளவில், 5,000 முதல் 20,000 ரூபாய் வரை கட்டணம் நிர்ணயம் செய்யப்பட்டுள்ளது.



மேலும், ஸ்பா போன்றவற்றிற்கு, 25,000 ரூபாய் வரை தொழில் உரிமம் கட்டணம் வசூலிக்கப்படுகிறது. இந்த அடிப்படையில், இந்தாண்டுக்கான மூன்றாண்டு கால புதுப்பித்தல் மார்ச் 31ல் முடிகிறது. குறிப்பிட்ட கால இடைவெளியில் புதுப்பிக்க, வியாபாரிகளை, மாநகராட்சி வருவாய்த் துறை அதிகாரிகள் வலியுறுத்தி வருகின்றனர்.

இழுத்தடிப்பு

ஏற்கனவே, மூன்றாண்டு கால கட்டணத்தை ஒரே தவணையில் செலுத்த வேண்டிய கட்டாயத்தில், சிறு வியாபாரிகள் இருக்கும் நிலையில், கமிஷன் தொகையையும், மூன்று மடங்கு வழங்க வேண்டும் என, அதிகாரிகள் மிரட்டுவதாக வியாபாரிகள் புகார் தெரிவிக்கின்றனர்.

இது குறித்து, வியாபாரிகள் கூறியதாவது: ஓராண்டு புதுப்பித்தலின்போது, புதுப்பிப்பதற்கான கட்டணத்தில் இருந்து குறிப்பிட்ட தொகையை, கமிஷனாக அதிகாரிகள் கேட்டு பெறுவர். தற்போது மூன்றாண்டு என மாற்றப்பட்டு உள்ளதால், அடுத்த இரண்டு ஆண்டுகள் வர மாட்டீர்கள். எனவே, மூன்றாண்டுக்கான கமிஷன் தொகையும் தாருங்கள் என்கின்றனர்.
உதாரணமாக ஓராண்டுக்கு, 5,000 ரூபாய் என, மூன்றாண்டுக்கு, 15,000 ரூபாய் வரை கமிஷன் கேட்கின்றனர்.

அவ்வாறு கமிஷன் தரவில்லை என்றால், புதுப்பித்தலின்போது, சில ஆவணங்கள் இல்லை என, இழுத்தடிப்பது தொடர்கிறது. இதனால், கடன் வாங்கியாவது சிறு வியாபாரிகள் மாநகராட்சி அதிகாரிகளுக்கு கமிஷன் கொடுத்து வருகின்றனர். இவ்வாறு அவர்கள் கூறினர்.