புதுடில்லி: ஆசிய கோப்பை கால்பந்து தகுதிச்சுற்று, முதல் போட்டியில் இந்திய பெண்கள் அணி, மங்கோலியாவை சந்திக்கிறது.
பெண்களுக்கான ஆசிய கோப்பை கால்பந்து தொடரின் 21வது சீசன், 2026, மார்ச் 1-26ல் ஆஸ்திரேலியாவில் (12 அணிகள்) நடக்கவுள்ளது. நடப்பு சாம்பியன் சீனா, 2, 3வது இடம் பிடித்த தென் கொரியா, ஜப்பான், தொடரை நடத்தும் ஆஸ்திரேலியா என 4 அணிகள் நேரடியாக பங்கேற்க உள்ளன.
மீதமுள்ள 8 அணிகளை தேர்வு செய்ய, தகுதிச்சுற்று போட்டிகள் ஜூன் 23-ஜூலை 5ல் நடக்க உள்ளன. மொத்தம் 34 அணிகள், 8 பிரிவுகளாக பிரிக்கப்பட்டு, போட்டிகள் லீக் முறையில் நடக்கும். ஒவ்வொரு பிரிவிலும் முதலிடம் பெறும் அணி, ஆசிய கோப்பை தொடருக்கு தகுதி பெறும்.
இந்திய அணி 'பி' பிரிவில் தாய்லாந்து, மங்கோலியா, ஈராக், திமோர்-லெஸ்தே அணிகளுடன் இடம் பெற்றுள்ளது. ஜூன் 23ல் நடக்கவுள்ள முதல் போட்டியில் இந்திய அணி, மங்கோலியாவை சந்திக்க உள்ளது.