புதுச்சேரி: இந்திய அரசு இளைஞர் நலன் மற்றும் விளையாட்டுத்துறை நேரு யுவ கேந்திரா சங்கதன் மற்றும் அரசு இணைந்து, மாநில அளவிலான பேச்சு போட்டியை நடத்தின.

புதுச்சேரி சட்டசபை, சபாநாயகர் கூட்ட அரங்கத்தில், வளர்ந்த பாரதம், இளைஞர் பாராளுமன்றம் எனும் தலைப்பில், பேச்சு போட்டி நடந்தது. சபாநாயகர் செல்வம் தலைமை தாங்கினார். நேரு யுவ கேந்திரா துணை இயக்குனர் தெய்வசிகாமணி வரவேற்றார். மாநில இயக்குனர் செந்தில்குமார், தலைவர் சக்திவேல் ஆகியோர் சிறப்புரை ஆற்றினர்.

நிகழ்ச்சியில், எம்.எல்.ஏ.,க்கள் ராமலிங்கம், வெங்கடேசன், இளைஞர் நலன் மற்றும் விளையாட்டுத்துறை செயலர் சுந்தரேசன், நாட்டு நலப்பணி திட்ட மாநில அலுவலர் சதீஷ்குமார் உட்பட கல்லுாரி மாணவர்கள், நேரு யுவ கேந்திரா பணியாளர்கள் கலந்து கொண்டனர்.

மாவட்ட அளவிலான நடந்த போட்டிகளில் வெற்றி பெற்ற 10 பேர் உரையாற்றினர். அதில், மூன்று பேர் தேர்ந்தெடுக்கப்பட்டு, டில்லியில் அடுத்த மாதம் நடைபெற உள்ள தேசிய அளவிலான இளைஞர் பாராளுமன்ற நிகழ்ச்சியில், பங்கேற்க உள்ளதாக துணை இயக்குனர் தெரிவித்தார்.