திருமழிசை:சென்னை - பெங்களூரு தேசிய அதிவிரைவு நெடுஞ்சாலையாக சீரமைக்கும் பணிகள் தற்போது நடந்து வருகிறது. இந்த நெடுஞ்சாலையில் வழியாக தினமும் ஒரு லட்சத்திற்கும் மேற்பட்ட வாகனங்கள் சென்று வருகின்றன.

இந்நிலையில், பூந்தமல்லி - ஸ்ரீபெரும்புதுார் டோல்கேட் வரை சீரமைப்பு பணிகள் நிறைவடைந்து விட்டது.

இந்த பகுதியில் திருமழிசை செல்லும் சாலை சந்திப்பு, நசரத்பேட்டை, செம்பரம்பாக்கம், பாப்பன்சத்திரம், செட்டிபேடு, தண்டலம், இருங்காட்டுகோட்டை உள்ளிட்ட 10க்கும் மேற்பட்ட கிராமங்கள் உள்ளன.

இப்பகுதியில், நெடுஞ்சாலையின் ஒருபுறம் உள்ள பேருந்து நிறுத்தத்திலிருந்து, மறுபுறம் உள்ள நிறுத்தத்திற்கு பள்ளி, கல்லுாரி செல்ல மாணவ - மாணவியர் மற்றும் 10க்கும் மேற்பட்ட கிராம வாசிகள் கடும் சிரமப்பட்டு வருகின்றனர்.

அதேபோல், இப்பகுதியில் உள்ள மருத்துவமனைக்கு செல்லும் பகுதிவாசிகளும் சிரமப்பட்டு வருகின்றனர். இப்பகுதியில் போக்குவரத்து சிக்னல் இருந்தும் பயன்பாட்டிற்கு வராததால், தேசிய அதிவிரைவு நெடுஞ்சாலையை கடந்து செல்லும்போது அடிக்கடி விபத்தில் சிக்கி வருகின்றனர்.

எனவே, சம்பந்தப்பட்ட அதிகாரிகள் ஆய்வு செய்து, போக்குவரத்து சிக்னலை பயன்பாட்டிற்கு கொண்டு வரவும், நடைமேம்பாலம் அமைக்கவும் நடவடிக்கை எடுக்க வேண்டுமென, அப்பகுதிவாசிகள் கோரிக்கை விடுத்துள்ளனர்.