புதுடில்லி; அரியலுாரில் 20 மெகாவாட் சோலார் மின் உற்பத்தி நிலையத்தை அமைக்க, 'பிரைம் கோல்டு ஸ்டீல் அண்டு பவர்' நிறுவனம் திட்டமிட்டு உள்ளது.

டில்லியை சேர்ந்த பிரைம்கோல்டு இன்டர்நேஷனல் நிறுவனம், ஸ்டீல், சிமென்ட் உள்ளிட்ட கட்டுமான பொருட்கள் தயாரிப்பில் ஈடுபட்டு வருகிறது. பசுமை ஸ்டீல் உற்பத்தியில் ஈடுபடுவதற்காக தனது பெயரை 'பிரைம்கோல்டு ஸ்டீல் அண்டு பவர்' என இந்நிறுவனம் மாற்றி கொண்டுள்ளது.

ஏற்கனவே காற்றாலை மின் உற்பத்தியில் ஈடுபட்டுள்ள இந்நிறுவனம், நீண்ட கால புதுப்பிக்கத்தக்க எரிசக்தி ஒப்பந்தத்தில் கவனம் செலுத்தி வருகிறது. தற்போது அரியலுாரில் 20 மெகாவாட் திறன் கொண்ட சோலார் மின் உற்பத்தி நிலையத்தை நிறுவ திட்டமிட்டுள்ள பிரைம்கோல்டு, இதன் வாயிலாக உற்பத்தியாகும் துாய மின்சாரத்தை நேரடியாக சொந்த தேவைக்கு பயன்படுத்த உள்ளது.

இந்த திட்டத்துக்காக, தேவைப்படும் நிலத்தை ஏற்கனவே கையகப்படுத்தி உள்ள இந்நிறுவனம், இந்திய புதுப்பிக்கத்தக்க எரிசக்தி மேம்பாட்டு முகமையிடம் இருந்து 65 கோடி ரூபாய் நிதியைப் பெற்றுள்ளது.