கோவை : குடியிருக்க வீடோ, வீட்டுமனையோ ஏதாவது ஒன்றை ஒதுக்கக் கோரி, கடந்த எட்டு ஆண்டுகளாக கலெக்டர் அலுவலகத்துக்கு நடையாய் நடக்கிறார், கணவனால் கைவிடப்பட்ட ஒரு இளம்பெண்.

கோவைப்புதுாரை அடுத்த அறிவொளி நகர், அண்ணாநகரை சேர்ந்தவர் செல்வி, 31; கணவனால் கைவிடப்பட்டவர். தாயார், குழந்தையுடன் வாடகை வீட்டில் வசித்து வருகிறார். தாயாரும் இவரும் வீட்டு வேலைக்கு சென்று, பிழைப்பு நடத்தி வருகின்றனர்.

கோவை கலெக்டர் அலுவலக மக்கள் குறைதீர்க்கும் பிரிவில், 2017 முதல் வீடு கேட்டு, மனு கொடுத்து வருகிறார். மனுவை ஏற்றுக்கொண்டனரா இல்லையா, விசாரணைக்கு போனதா, பரிசீலனையில் இருக்கிறதா என்று, எந்த விபரமும் தெரியாமல், வாரந்தோறும் மனுக்களை கலெக்டரிடம் சமர்ப்பித்து வருகிறார்.