கிராஸ்லோப்மிங்: 'கிராண்ட் ப்ரி' செஸ் தொடரின் 3வது சுற்றை இந்திய வீராங்கனை வைஷாலி 'டிரா' செய்தார்.

சர்வதேச செஸ் கூட்டமைப்பு சார்பில் பெண்களுக்கான 'கிராண்ட் ப்ரி' செஸ் தொடர், 6 கட்டமாக நடத்தப்படுகிறது. இதில் 'டாப்--2' இடம் பிடிப்பவர்கள், கேண்டிடேட்ஸ் தொடரில் (உலக கோப்பை தகுதி போட்டி) பங்கேற்கலாம். இதுவரை முடிந்த 5 கட்ட போட்டிகளின் முடிவில் ரஷ்யாவின் அலெக்சாண்ட்ரா (308.34 புள்ளி), இந்தியாவின் ஹம்பி (279.17) முதலிரண்டு இடத்தில் உள்ளனர்.
இதன் கடைசி, 6வது தொடர் ஆஸ்திரியாவில் நடக்கிறது. இந்தியா சார்பில் வைஷாலி பங்கேற்கிறார். இதன் 3வது சுற்றில் வைஷாலி (வெள்ளை), ஜார்ஜியாவின் நானா டிசாக்னிட்ஸே (கருப்பு) மோதினர். விறுவிறுப்பான இப்போட்டி 40வது நகர்த்தலில் 'டிரா' ஆனது.


மூன்று சுற்றுகளின் முடிவில் தமிழகத்தின் வைஷாலி, உக்ரைனின் அனா முசிசுக்குடன் (தலா 2.5 புள்ளி) முதலிடத்தை பகிர்ந்து கொண்டுள்ளார்.