அல் அய்ன்: ஆசிய கோப்பை ஐஸ் ஹாக்கியில் இந்திய பெண்கள் அணி வெண்கலப் பதக்கம் வென்றது.
ஐக்கிய அரபு எமிரேட்சின் அல் அய்ன் நகரில், பெண்களுக்கான ஆசிய கோப்பை ஐஸ் ஹாக்கி தொடர் நடந்தது. இந்தியா, மலேசியா உட்பட 6 அணிகள் பங்கேற்றன. ஒவ்வொரு அணியும் மற்ற அணிகளுடன் தலா ஒரு முறை மோதின.
இந்திய அணி முதல் இரு போட்டியில் மலேசியா (1-3), ஈரானிடம் (4-5) தோற்றது. அடுத்து ஐக்கிய அரபு எமிரேட்சை 5-4 என்ற கோல் கணக்கில் வீழ்த்தியது. அடுத்து பிலிப்பைன்சிடம் 1-4 என தோற்ற இந்தியா, கடைசி போட்டியில் கிர்கிஸ்தானை 'ஷூட் அவுட்' முறையில் 3-2 என வென்றது.
இதையடுத்து 5 போட்டியில் 7 புள்ளியுடன் பட்டியலில் 3வது இடம் பெற்ற இந்தியாவுக்கு, வெண்கலம் கிடைத்தது. பிலிப்பைன்ஸ் (15, தங்கம்), ஈரான் (12, வெள்ளி) முதல் இரு இடம் பிடித்தன.