பிரிட்ஜ்டவுன்: வெஸ்ட் இண்டீஸ் சென்றுள்ள ஆஸ்திரேலிய அணி 3 டெஸ்டில் பங்கேற்கிறது. முதல் டெஸ்ட் பிரிட்ஜ்டவுனில் நடக்கிறது. முதல் இன்னிங்சில் ஆஸ்திரேலியா 180 ரன் எடுத்தது. வெஸ்ட் இண்டீஸ் அணிக்கு கடைசி நேரத்தில் ராஸ்டன் சேஸ் (44), ஹோப் (48) கைகொடுக்க முதல் இன்னிங்சில் 190 ரன்னில் ஆல் அவுட்டாகி, 10 ரன் முன்னிலை பெற்றது.
அடுத்து களமிறங்கிய ஆஸ்திரேலிய அணிக்கு கான்ஸ்டாஸ் (5), கவாஜா (15) ஜோடி துவக்கத்தில் ஏமாற்றியது. கேமாரன் கிரீன் 15 ரன்னில் கிரீவ்ஸ் பந்தில் அவுட்டானார். இங்லிஸ் (12), ஜேடன் சீலஸ் பந்தில் போல்டானார். இரண்டாவது நாள் முடிவில் ஆஸ்திரேலிய அணி, இரண்டாவது இன்னிங்சில் 92/4 ரன் எடுத்து, 82 ரன் முன்னிலை பெற்றிருந்தது. ஹெட் (13), வெப்ஸ்டர் (19) அவுட்டாகாமல் இருந்தனர்.
ஹெட் அபாரம்
நேற்று மூன்றாவது நாள் ஆட்டம் நடந்தது. வெஸ்ட் இண்டீஸ் வேகங்களை சமாளித்த இருவரும் அணியை சரிவில் இருந்து மீட்டனர். கிரீவ்ஸ் பந்தை பவுண்டரிக்கு அனுப்பிய ஹெட் (61), வெப்ஸ்டர் (63) அரைசதம் அடித்தனர். ஆஸ்திரேலிய அணி இரண்டாவது இன்னிங்சில் 233/6 ரன் எடுத்து 223 ரன் முன்னிலை பெற்றிருந்தது. அலெக்ஸ் கேரி (43), கம்மின்ஸ் (3) அவுட்டாகாமல் இருந்தனர்.