விசாகப்பட்டனம்: புரோ கபடி லீக் போட்டியில் தெலுங்கு டைட்டன்ஸ் அணி 45-37 என, மும்பை அணியை வீழ்த்தியது.

இந்தியாவில், புரோ கபடி லீக் 12வது சீசன் நடக்கிறது. விசாகப்பட்டனத்தில் நடந்த லீக் போட்டியில் மும்பை, தெலுங்கு டைட்டன்ஸ் அணிகள் மோதின. மும்பை வீரர்களை இரண்டு முறை 'ஆல்-அவுட்' செய்த தெலுங்கு டைட்டன்ஸ் அணி, முதல் பாதி முடிவில் 27-11 என முன்னிலையில் இருந்தது.

இரண்டாவது பாதியில் எழுச்சி கண்ட மும்பை அணிக்கு 26 புள்ளி கிடைத்தது. ஆட்டநேர முடிவில் தெலுங்கு டைட்டன்ஸ் அணி 45-37 என்ற கணக்கில் வெற்றி பெற்றது. தெலுங்கு டைட்டன்ஸ் அணிக்கு 'ஆல்-ரவுண்டர்' பரத் (13 புள்ளி), சேட்டன் சஹு (6), கேப்டன் விஜய் மாலிக் (5) கைகொடுத்தனர். மும்பை அணி சார்பில் கேப்டன் சுனில் குமார், சதிஷ் கண்ணன் தலா 6 புள்ளி பெற்றனர்.

மற்றொரு லீக் போட்டியில் புனே அணி 43-32 என, உ.பி., அணியை வீழ்த்தியது.

இதுவரை விளையாடிய 5 போட்டியில், 3 வெற்றி, 2 தோல்வி என 6 புள்ளிகளுடன் தெலுங்கு டைட்டன்ஸ் அணி 3வது இடத்துக்கு முன்னேறியது. இரண்டாவது தோல்வியை பெற்ற மும்பை அணி (6 புள்ளி) 4வது இடத்துக்கு தள்ளப்பட்டது. புனே அணி (8 புள்ளி) முதலிடத்தில் உள்ளது.