சென்னை : 'அண்ணா பல்கலை வளாக கல்லுாரி மாணவர்களுக்கு, செமஸ்டர் தேர்வு முடிவுகள் வெளியான 15 நாட்களுக்குள் துணைத்தேர்வு நடத்தப்படும்' என அண்ணா பல்கலை தெரிவித்துள்ளது.

அண்ணா பல்கலை வளாகத்தில் கிண்டி இன்ஜினியரிங் கல்லுாரி, அழகப்பா தொழில்நுட்ப கல்லுாரி, சென்னை தொழில்நுட்ப நிறுவனம், கட்டடக்கலை மற்றும் திட்டமிடல் கல்லுாரிகள் இயங்கி வருகின்றன.

இந்த கல்லுாரிகளில் இம்மாதம் துவங்கும் செமஸ்டர் தேர்வுகள், டிசம்பரில் நிறைவடைகின்றன. அம்மாத இறுதியில் தேர்வு முடிவுகள் வெளியாக உள்ளன. இவற்றில் தேர்ச்சி பெறாதவர்கள், மீண்டும் தேர்வெழுத ஆறு மாதங்கள் வரை காத்திருக்க வேண்டும்.

அவர்கள் நலனை கருத்தில் வைத்து, தேர்வு முடிவுகள் வெளியான 15 நாட்களுக்குள், துணைத்தேர்வுகள் நடத்த அண்ணா பல்கலை திட்டமிட்டுள்ளது. அடுத்த ஆண்டு ஜனவரி இரண்டாவது வாரத்தில் அவற்றை நடத்தி, உடனடியாக முடிவுகளை வெளியிடவும் திட்டமிட்டுள்ளது.