ஸ்ரீநகர்: ஜம்மு காஷ்மீரின் தோடா மாவட்டத்தில் இன்று (ஜனவரி 22) ராணுவ வாகனம் ஒன்று பள்ளத்தாக்கில் விழுந்து விபத்துக்குள்ளானதில் 10 வீரர்கள் உயிரிழந்தனர், மேலும் பலர் காயமடைந்தனர்.

ஜம்மு-காஷ்மீர் மாநிலம் தோடா மாவட்டத்தில் ராணுவ வாகனம் ஒன்று, 17 வீரர்களுடன் சென்றுகொண்டிருந்தபோது, கானி டாப் என்ற பகுதியில் டிரைவரின் கட்டுப்பாட்டை இழந்து அருகில் இருந்த 200 அடி பள்ளத்தாக்கில் கவிழ்ந்து விபத்துக்குள்ளானது. இந்த விபத்தில் 10 வீரர்கள் உயிரிழந்தனர்.மற்றவர்கள் காயமடைந்தனர்.
விபத்து நடந்தது குறித்து தகவல் கிடைத்தவுடன் ராணுவம், காஷ்மீர் போலீசார், உள்ளூர் பொதுமக்கள் இணைந்து மீட்புப் பணிகளில் ஈடுபட்டனர்.
காயமடைந்த வீரர்கள் மீட்கப்பட்டு மருத்துவமனையில் அனுமதிக்கப்பட்டுள்ளனர். பலத்த காயமடைந்தவர்கள் மேல் சிகிச்சைக்காக உதம்பூர் ராணுவ மருத்துவமனைக்கு ஹெலிகாப்டர் மூலம் கொண்டு செல்லப்பட்டனர்.